POSIBILIDAT DI SUPSIDIO DI SIB PA EKSPANDÉ BO NEGOSHI DEN EKSTERIOR

Seshon di pregunta di RVO kon pa apliká pa e supsidio akí 

Willemstad- Djamars, 16 di aprel próksimo kuminsando 10’or di mainta, Rijksdienst voor Ondernemend Nederland (RVO) ta organisá un seshon di pregunta i kontesta online tokante e supsidio ‘Support International Business’ (SIB). Si akaso bo ta un empresario aktivo na Kòrsou, Aruba, Boneiru, St. Maarten, Saba òf St. Eustatius ku e ambishon pa ekspandé bo negoshi den eksterior, RVO por sostené bu via e supsidio akí.  Ku e supsidio di SIB, empresarionan por finansiá aktividatnan den nan empresa ku lo mehorá nan oportunidatnan den paisnan di interes den eksterior.

E seshon di pregunta i kontesta ku lo tuma lugá dia 16 di aprel próksimo, ta bai enfoká pa kontestá tantu preguntanan di e empresario ku ya ta konosí ku e supsidio di SIB komo tambe empresarionan ku awor ta keda introdusí na esaki. No solamente e empresario por partisipá na e seshon akí, pero tambe profeshonalnan ku ta yuda empresarionan ku nan aplikashon pa supsidionan disponibel, inkluso e supsidio di SIB.

Empresarionan ku ke partisipá mester ta konosí kua merkado ekstranhero e ta deseá di eksportá su produkto òf servisio p’e i mester mustra e kapasidat i ambishon pa tuma e siguiente pasonan pa ekspandé su negoshi den eksterior. Partisipashon na e seshon ta kompletamente grátis, pero ta rekerí registrashon promé ku djaluna 15 di aprel. Despues di registrashon, e partisipante ta risibí un e-mail ku informashon i dato pa por djòin e seshon online dia 16.

Durante e seshon di pregunta i kontesta akí, lo bo risibí informashon kon RVO i SIB por sostené bu den hasimentu di negoshi den eksterior, e kondishonnan pa apliká pa e supsidio di SIB i kon pa apliká, pero tambe lo tin espasio pa kontestá preguntanan spesífiko di e partisipantenan. Si tin kualke pregunta tokante e seshon akí, por tuma kontakto via sib@rvo.nl òf via MEO na info.meo@gobiernu.cw pa mas informashon.