Tin inhustisia den nominashon di Deportista di Aña di FDOK?

Apresiabel medio di Prensa Deportivo,
E intenshon di e komunikado aki no ta pa bagatelisá, ofendé ni despresiá ningun
hende, evento ni organisashon deportivo. Pero, nos ke simplemente trata na evitá
ku inkonsientemente inhustisia ta sigui wòrdu kometé.
Despues di a tuma nota di FDOK su nominadonan pa Deportista, Dirigente, Wes i
Ekipo di aña 2023, nos di e organisashon Pichingolo ta sinti e nesesidat pa deshogá
nos kurason i trese nos sinsero opinion i sintimentunan, relashoná ku un inhustisia
grandi ku segun nos ta keda kometé kontra di e humilde hóben deportista Thaíma
Maximiliana.
1. Na aña 2021, Thaíma a keda postulá pa CSB komo prospekto di aña. E tempu
ei Thaíma ta tin solamente 13 aña di edat i tabata e “shortstop” estelar di
Pichingolo hubenil, klase A i klase dòbel A. E la bati pa un averahe di 400
punto den tur e kategorianan kombiná. E la enfrentá e mihó picher di Kòrsou
den tur e kategorianan i e mihó picher di Colombia den klase dòbel A. E la
sali kampion ku Pichingolo klase dòbel A kaminda e la destaká ku tantu su
bate i wante. Ku apénas 14 aña e la kuminsá train ku e preselekshon di sòftbòl
di Kòrsou.
2. Durante aña 2022, Thaíma (14 aña di edat) a enfrentá e mihó pichernan di
tantu Kòrsou, Colombia i di Hulanda ku hopi éksito. E la yuda Pichingolo klase
dòbel A sali kampion di Kòrsou tantu ku su bate i wante. Ta bon pa remarká
ku tabata Thaíma ku a konektá e hit di oro, kontra e picher estelar di Hulanda
ku a kaba di gana e kampionato di Europa, pa Pichingolo gana e di dos (2)
wega di playoff final. Thaíma tambe tabata e “shortstop” estelar di selekshon
di sòftbòl di Kòrsou na e kampionato Suramerikano na Argentina, kaminda e
la destaká apesar di ta tin ku hunga pa promé bia den un temperatura hopi
friu (Kòrsou a terminá na di tres lugá).
3. Na aña 2023, Thaíma (15 aña di edat) a sali kampion ku Pichingolo tantu den
klase A (sin pèrdè niun wega) i klase dòbel A. Durante kampionato i playoff
klase dòbel A Thaíma a enfrentá diferente picher di nivel ku a bin for di
Guatemala, Colombia, Argentina i Hulanda. Thaíma a sali kampion bate di
klase A i a terminá na di tres lugá den klase dòbel A. Na nivel internashonal,
Thaíma atrobe tabata e “shortstop” estelar di e selekshon di Kòrsou ku a gana
e kampionato di ECACS i tersera base estelar durante “Juegos Centro
Americano y del Caribe” na El Salvador. Prinsipalmente su aktuashon na nivel
internashonal a kapta atenshon di vários skol sekundario merikano (College),
ku e resultado ku e la optené un “full scholarship” pa e aña di skol 2024/2025.
Pues, den un lapso di tres aña, ku edat di 13, 14 i 15 aña, Thaíma a destaká
inmensamente tantu lokal komo internashonal ku tantu su bate, wante i
inteligensia. Mas remarkabel i di balorá ta ku semper Thaíma a kompetí i destaká
hungando kontra hungadónan di mas edat i madurá kuné.
Ademas, Thaíma ta práktika e deportenan di futbòl, kaminda e ta forma parti di e
selekshon femenino U-15, i for di yanüari 2024 atletismo, kaminda den su promé
aña e la klasifiká na di promé lugá den e disiplina di tira Javelin i asina haña e
derecho i oportunidat pa representá Kòrsou na e weganan di Carifta na Granada.
Aki nan e la keda na di sinku (5) puesto, tirando e Javelin mas ku 41 meter leu pa
un promé bia.
No opstante tur su logronan den e último tres (3) añanan, nunka Thaíma a sikiera
keda nominá pa e premio di Deportista Hubenil òf Prospekto di Aña di FDOK. Ni
sikiera a amplia e kantidat di nominado den su kategoria, manera a sosodé na
diferente okashon den pasado, di moda ku Thaíma por a keda sikiera nominá.
Lástimamente, ku esaki no por bira posibel nunka mas, dor ku Thaíma den luna
di ougùstùs 2024 ta bai sigui ku su estudio den eksterior i no ta bin na remarke
pa kompetí pa un premio di Deportista di aña di FDOK. E la pèrdè un
rekonosimentu mas ku meresí, ku nunka mas e por haña komo un hóben. Esaki
pa nos ta un inhustisia hopi grandi kontra di un humilde hóben super deportista
ku shete (7) dia pa siman ta riba tereno di deporte praktikando su deportenan
faborito ku hopi smak i hopi na serio. E situashon aki ta kousando hopi disgustu i
lamento. Primeramente serka e deportista mes, su famia i tambe e organisashon
Pichingolo.
Promé ku nos despedí, nos ke rekomendá e komishon ku ta enkargá ku e
nominashon nan pa evitá e tipo di disgustu i lamento aki den futuro, dor di
averiguá i tene bon kuenta ku:
1. Nivel di e kampionato/torneo lokal/internashonal na kua e Deportista a
partisipá;
2. Kondishon bou di kua e Deportista a kompetí;
3. Edat i nivel di e deportistanan ku e Deportista ta kompetí kontra di dje
4. Grado di difikultat di e deporte.
Nos ta despedí ku un saludo deportivo.
Saludo,
_____________________
Fenton Thomasita