REUNION DI PLATAFORMA DI KONSULTÁ MARÍTIMO (MOP) I FIRMAMENTU PLAN DI AKSHON KOREKTIVO

Willemstad – Riba 15 di aprel, a tuma lugá e Reunión di Plataforma di Konsultá Marítimo (MOP) na Boneiru. Representantenan di outoridatnan marítimo di Hulanda, e islanan BES, Kòrsou i Sint Maarten a reuní pa diskutí asuntu importante ku ta afektá e navegashon regional i siguridat marítimo.

E sektor marítimo i e sektor áereo na Kòrsou ta proveé kuponan di trabou pa  mama i tatanan di famia den diferente forma, manera Outorifat Marítimo di Kòrsou, havenmeester i su tim, trahadónan den henter e área di haf, Outoridat di Aviashon di Kòrsou, kontroladónan áereo, personal di aeropuerto, i mas. E tipo di reunionnan aki ta importante pa garantisá seguridat di tantu e trahadó komo usuario. Tambe e sektor aki ta di kontribushon grandi na nos ekonomia.

Minister Presidènt Sr. Gilmar Pisas ta na Boneiru pa asistí na e reunion ministerial. Minister Presidènt ta funshoná komo representante di e Minister di Tráfiko, Transporte i Planifikashon Urbano, señor Charles Cooper.

E siguiente reunion di MOP ta planiá pa 25 di yüni 2024. Ademas, ta wardando riba un bishita di trabou na final di sèptèmber 2024, i reunionnan virtual adishonal na novèmber 2024.

Ministernan di Aruba, Kòrsou i Hulanda ta reuní na Boneiru pa papia tokante asuntunan ku ta regardá seguridat di tráfiko marítimo i áereo. Durante siman e ekspertonan ta reuni pa asina kaba traha riba e plan di akshon korektivo pa manda esaki pa International Maritime Organization (IMO). E plan aki lo ser elaborá pa asina bin ku un plan mas detayá ku un planifikashon di e akshonnan ku mester tuma pa asina por kumpli, na un manera struktural, ku e obligashonnan internashonal di aviashon i seguridat marítimo.