Minister di GMN ta laga determiná e kapasidat di (para)médikonan nesesario pa kuido di salú na Kòrsou di nobo
Willemstad, 4 di mei 2024 – Ministerio di Salú Públiko, Medio Ambiente i Naturalesa ta anunsiá establesimentu di e Komishon Planifikashon di Kapasidat di Kuido di Salú 2024 -2030 (Commissie Capaciteitsplanning Gezondheidszorg 2024-2030), ku e meta pa desaroyá un planifikashon aktualisá di e kapasidat pa kuido di salú na Kòrsou. E komishon aki lo remplasá e instrukshonnan aktual dor di duna un bista mas aktual i presis di e spesialistanan médiko nesesario riba e isla.
Segun e disposishon legal, establesé den artíkulo 6 di e Ordenansa Nashonal di Restrikshon di Establesimentu di Spesialistanan Médiko (Landsverordening Beperking Vestiging Medische Beroepsbeoefenaren), e komishon nobo lo asumí e tarea pa traha den kolaborashon ku tur interesado i stakeholder pa ehekutá un investigashon profundo riba e nesesidat di kuido di salú na Kòrsou.
E desishon pa establesé e komishon ta salí for di e opservashon ku e instrukshonnan aktual, manera stipulá den e dokumento “Capaciteitsplanning Gezondheidszorg 2018-2019”, no ta kumpli ku e eksigensianan mas, pa motibu di envehesimentu i e desaroyonan rápido riba e tereno di kuido di salú i profeshonnan médiko.
E Komishon, dirigí pa prof. dr. S. O. Keli, Inspektor General di Salú Públiko, lo traha den estrecho kolaborashon ku representantenan di diferente stakeholders, inkluyendo Inspekshon di Salú Públiko, Banko di Seguro Sosial, Institutonan médiko i asosiashonnan di spesialistanan médiko.
Establesimentu di e komishon aki ta enfatisá e importansia ku ta duna na informashon aktualisá i presis pa por sigui sostené i desaroyá kuido médiko na Kòrsou efektivamente.
Denter di un término di 3 luna, e Komishon lo presentá su resultadonan na Minister di Salú Públiko, Medio Ambiente i Naturalesa pa aprobashon. Despues di esaki, lo adoptá e dokumento nobo “Capaciteitsplanning Curaçaose Gezondheidszorg 2024-2030” komo e guia nobo pa establesimentu di spesialistanan médiko riba e isla.
