KÒRSOU VS BARBADOS 5 YÜNI PRÓKSIMO DEN STADION ERGILIO HATO! KARCHINAN TA DISPONIBEL!
Despues ku nos selekshon nashonal maskulino ta tin un tremendo ‘trainingskamp’ 2 luna pasá na Turkia komo preparashon pa nos partidonan di kualifikashon pa Mundial di FIFA den luna di yüni 2024, preparashonnan ta kontinuá pa e partidonan mes mes, ku ta na kaminda.
Nos promé enkuentro lo ta dia 5 di yüni próksimo kontra Barbados aki na Kòrsou den Stadion Ergilio Hato pa mitar di 8 di anochi. Seguidamente nos selekshon lo biaha pa Aruba kaminda nos lo enfrentá Aruba dia 8 di yüni 2024 den Centro Deportivo Guillermo Prospero Trinidad pa 8’or di anochi.
E karchinan pa e partido entre Kòrsou i Barbados lo ta na benta entrante mañan, 8 di mei na tur punto di benta. Entrada general pa e partido aki ta kosta fl.25 pa adulto miéntras mucha di 6 pa 12 aña i 60+ ta paga fl.15,-. VIP ta kosta fl.175 ku bibida i ‘snacks’ inkluí.
Karchinan ta optenibel na siguiente puntonan di benta;
- Ofisina di FFK (9am-5pm) tene kuenta ku riba 9 di mei ofisina ta será.
- Pòmp di gasolin Sta Maria
- Botika Mampuritu
- 4th of July snèk na Barber
- Mensing’s Caminada
Pronto nos entrenadó sr. Dick Advocaat i su staf tékniko lo presentá e lista di hungadónan ku lo representá Kòrsou durante nos próksimo kompromisonan pa kualifikashon pa Mundial di FIFA.
Preparashonnan lo kontinuá pa nos selekshon su kompromisonan dianan 5 i 8 di yüni próksimo.
Buska bo karchi trempan pa no keda afó…keda pendiente pa mas informashon!
