Spich selebrashon dia di enfermeria na CMC
Spich selebrashon dia di enfermeria na CMC
Mòru bondia na boso tur, na prome luga mashá pabien pasobra awe nos ta selebra dia di enfermeria i masha danki ku mi por festeha huntu ku boso.
Mi ta yama Dios danki pa kada un di boso, danki pa e gran esfuerso ku boso a bin ta hasi dia tras dia, aña tras di aña. Danki pa keda duna un servisio di kurason na boso kerido pashèntnan, kual den mayoria kaso ta nos famia- i amigunan ku ta bini CMC pa haña e kuido mediko nesesario.
Mi sa ku boso no tin e fásil, paso boso situashon di trabou no ta optimal, pero no obstante esaki boso prestashonnan ta monumental. For di momentu ku mi a asumí e funshon di Minister di Salubridat mi a tuma nota ku CMC tin hopi reto, anto e retonan aki no ta solamente finansiero.
Ku hopi amor i dedikashon mi ta konfrontando e retonan aki. Gustosamente mi ke komparti e esfuersonan ku boso, na okashon di dia di enfermeria.
Pa boso keda positivo den boso trabou, ta importante pa boso sa kiko a tuma lugar I kiko ta tumando lugar. Ami ta konsidera boso enfermero I enfermeronan importante I balioso, pues boso mester dispone di tur informashon importante.
Aksesibilidat di nos salubridat
Nos tabatin i ainda tin problema ku aksesibilidat di nos salubridat. E reto ta sumamente grandi, i pa gran parti e ta kai riba boso skoudernan. Na final di kuenta ta boso ta e pilar di e kuido mediko ku CMC ta brinda na nos pashèntnan. Mi ta bolbe aksentua ku boso ta e pilarnan di CMC!
Esaki ta e esenario ku mi a enkontrá ora mi a bira Minister di Salubridat:
● Hendenan ta warda lunanan i tin biaha años riba un sita. Esaki no ta korekto, pasobra nos tur ta paga prima di Seguro Básiko, konosí komo BVZ.
● E kuido mediko no tabata mesun aksesibel pa tur hende. Un asegurado tin DERECHO riba kuido mediko na tempu. Un lista di espera (wachtlijst) muchu largu ta empugna ku e derecho aki.
● Bo no por laga un pashènt sufri, sin ku e haña un sita ku un spesialista òf un sita pa un operashon.
Retnan sosial i prensa tabata dediká hopi atenshon na problemanan den salanan di operashon di CMC. Indikando problemanan enkuanto planiamentu di operashonnan den CMC, skarsedat di personal di sala di operashon, i e lista di espera demasiado largu den CMC.
Inspektor-General di Salubridat Públiko a hasi un investigashon pa e sa kiko ta e motibunan pa e listanan di espera largu pa operashonnan, i e a yega na e sigiente konklushonnan:
1. Skarsedat di spesialistanan, asistentenan di sala di operashon i di anestesista tabata okashoná lista di espera largu pa operashonnan.
2. E espasio di tempu den kua por traha un sita ta muchu korto, paso por traha un sita solamente te 4or di atardi.
3. Tabata plania tantu e pashèntnan komo e personal di sala di operashon robes.
4. Sierto bia tabata tene pashèntnan demasiado largu na liña, òf tabata skùif nan sita pa diferente motibu, tin biaha tabata skuif nan sita varios luna.
Pa haña sita ku spesialistanan tambe tabatin un lista di espera largu. Un lista di espera muchu largu ta okashoná tur sorto di desventaha pa e pashentnan, entre otro retrasonan den e proseso pa yega na un diagnóstiko pa pashèntnan. Mas bo tarda pa diagnóstika un enfermedat, mas leu e enfermedat por sigui desaroyá ku tur e konsekuensianan negativo ku esaki por kousa. Pa e motibu ei mester tene e proseso di diagnostiká e situashon serka un pashènt mas korto posibel, es desir ku mester atendé e pashènt mas lihé posibel.
Tur esakinan ta situashonnan ku no ta kousá door di boso enfermera I enfermeronan, pero ta bosonan ta esnan ku ta dilanti na frontera pa atende ku pashentnan I ku mester trata pashentnan a lo major I keda semper atento. Pues boso bida komo enfermera no ta fasil, I pesei ta importante pa nos realisa esei. Pasobra e enfermera I enfermero ta esnan ku segun pashent mester aktua I solushonan tur problema, I a la bes sa tur kos di pashent I kontesta tur pregunta di pashent I famia. I hopi biaha bou di kontesta, ta kontesta positive pashent I famia kier tende I no ta tur bia realidat ta hasi kontesta positibo possibel.
E fondonan ku CMC ta risibí serka SVB mester keda usá door di CMC pa kumpli ku su obligashonnan di kuido. Pues, CMC mester usa e fondonan aki pa ofresé e kuido akordá, pa duna e konsultanan palabrá, i pa realisá e operashonnan akordá. Ta importante pa husa e fondonan aki pa reklutá sufisiente personal kualifiká, pa garantisá kalidat di kuido, pa paga oranan di overtime i pa preveni un lista di espera muchu largu.
Ora tin falta di personal, ta enfermeria ta e prome kaminda ku esaki ta manifesta su mes. Boso trabou ta bira mas pisa pasobra ku menos hende mester hasi e mesun trabou di enfermeria. E preshon ta subi I esaki ta alsa e riesgo pa erornan sosode. Sin embargo semper boso ta tene boso profeshon na laira I presta a lo maksimo. Esei ta balornan hopi importante di enfermeria I pesei boso ta merese tur elogio, a pesar di tur difikultat.
Tabatin hopi deliberashon ku CMC tokante di e listanan di espera sin ku a logra adelanto den bahamentu di e reinan I listanan di espera.
Finalmente, esaki a resultá den un instrukshon, asiná yama aanwijzing, di Inspektor General di Salú Públiko na CMC.
Gobièrnu a bai di akuerdo ku un proposishon pa maksimalisá e listanan di espera pa konsultanan, diagnóstikonan médiko i operashon di pashèntnan. E lista di espera maksimo a drenta na vigor for di 1 di òktober 2023, ku un periodo di transishon te ku 30 di yüni próksimo pa eliminá e listanan di espera eksistente pa konsultanan i operashonnan. Ademas, gobièrnu a perkurá pa amplia e kapasidat di kuido di otro institutonan médiko, di manera ku e institutonan aki tambe por atendé e konsultanan, operashonnan i listanan di espera largu.
Esaki lo mester alivia boso trabou tambe, pues baha e preshon di trabou pa asina boso lo por funshona ku menos stress.
Spesialistanan mediko di CMC
Mi mester a trata e retonan pa lokual ta trata spesialistanan mediko di CMC. Sigur despues ku e Landsverordening Normering Topinkomens (LNT) a drenta na vigor. Mi a instala un werkgroep, den kual tantu speshalistan mediko, SVB, GMN i resientemente directie di CMC ta forma parti, pa trata e sigiente puntonan:
1. Subi e kalidat di kuido den CMC door di entre otro bini ku medidanan pa subi kalidat i baha e lista di espera
2. Eksplora e posibilidat pa subi e salario maksimo pa speshalistanan den CMC dentro di e kuadro di LNT.
3. Bini ku un asina yama prestatiebeloning i prestatiemeting pa speshalistanan mediko, es desir ku e salaris di un speshalista lo depende di su prestashon den varios aria i lo bin ku normanan pa midi esakinan.
4. Mehora i/of fortalese e prosedura di trabou di e asina yama medische staf
5. Bini ku insentivonan pa atrae i mantene speshalistanan mediko, entre otro mehora e finansiamentu di e edukashon permanente ku speshalistanan mediko mester kumpli ku ne.
Dia 31 di mei awo e werkgroep lo prensenta na ami e solushonan riba e puntonan ku mi a kaba di menshona, pa despues mi bai Raad van Ministers ku esakinan.
Diferente fondo di likides a wordu duna na CMC
Komo Minister di GMN i di Finansa, mi a kontribuí finansieramente ku CMC na diferente momentu i di diferente manera.
Den pasado gerensha di CMC a duna di konosé na diferente minister di GMN ku e gastunan di kuido relashoná ku onverzekerden (no-aseguradonan) mester wòrdu kubrí pa gobièrnu. E gastunan den transkurso di e añanan 2019 te ku 2022 a subi i yega un montante di 19.6 mion florin. E ministernan di Salubridat anterior a trata e tópiko aki na varios okashon den Konseho di Minister, pero esaki nunka a hiba na atendementu di e situashon pa medio di maneho nobo i/òf kompensashon finansiero na CMC. Kabinete Pisas si a atendé e tópiko aki i no solamente a inkluí esaki den e asina yamá Bestuurlijk Hoofdlijnenakkoord Sanering CMC-entiteiten, kual a keda akordá dor di gobièrnu i CMC, pero tambe a duna CMC NAf 19,6 mion pa kubri e gastunan di onverzekerden. Pronto lo yega na palabrashon ku gerensia di CMC pa asina por kuminsa kontrola e gastunan di onverzekerden di 2023.
Esaki tambe pa boso ta un alivio, pasobra mi sa ku pa boso ta difisil pa no por duna kuido pasobra un hende ta indokunenta, Al fin al kabo e tambe ta un humano i merese tur trato nesesario. E ta nifika tambe ku lo sosode menos ku ta den situashon urgente boso ta topa indokumentadonan pa atende ku ne. Boso trabou komo enfermero I enfermera ta keda hopi balioso.
Despues di un diferensia di opinion ku a dura largu tempu entre gerensia di CMC i Ministerio di GMN tokante di e presupuesto di kuido (zorgbudget) di añanan 2019-2021, Ministerio di GMN a korigí e presupuesto di kuido di CMC ku un montante di 8 mion florin, ku forsa retroaktivo. E montante aki ya a wordu paga na CMC. Ademas di e oumento di NAf 8 mion, Ministerio di GMN a akordá tambe un montante adishonal di 1 mion florin pa akreditashon di CMC, kual montante tambe a wordu paga kaba na CMC.
Otro kaso ku gabinete Pisas a solushona ta e gastunan di transishon ku nunka a wordu paga den pasado. Ya kaba nos a paga CMC NAf 19 mion florin di e NAf 20 mion ku nos a risibi komprobantenan di pago door di CMC. Den proksimo lunanan lo sigi kontrola dokumentonan nesesario pa asina deriva si akaso tin mas gastu di transishon ku tin ku paga, teniendo kuenta ku ya kaba SVB ta pagando e fiansa di e konsortio (VidaNova). Na momentu ku hasi e kuenta final di e transitiekosten lo tene debido kuenta ku esaki.
Tumando tur kos na konsiderashon, mi ministerio a kontribuí ku alrededor di 50 mion florin na CMC.
Sostenibilidat di funshonamentu di CMC
Pa atendé definitivamente ku e problemanan di CMC, mester hasi funshonamentu di CMC mas sostenibel. Pa por hasi esaki posibel a krea un ruta spesial, ku por wordu resumí di e siguiente manera:
● Outoridat di Kuido Hulandes (Nederlandse Zorgautoriteit, konosí komo NZa) a hasi un investigashon riba CMC i a saka un rapòrt na aprel 2022.
● Na òktober 2022 a sera un akuerdo, e asina yamá hoofdlijnenakkoord (HLA) entre gobièrnu i entidatnan di CMC.
● Tur e rekomendashonnan di NZa i puntonan di akshon di HLA ta aktualmente den implementashon.
● KPMG Health Hulanda a hasi varios investigashon kual su resultadonan lo wordu alinia i komplementa ku e resultado di e investigashon di KPMG Corporate Finance Hulanda kual ta den fase final. E motibu ku e lastu investigashon di KPMG no ta kla ainda tin di haber ku e echo ku KPMG mester a warda riba un presupuesto di mas aña, kual a wordu entrega door di CMC apenas mei-mei di mart.
● Finalmente e Begeleidingscommissie KPMG i e Regiegroep Sanering CMC-entiteiten (den kual CMC ta forma parti) lo evaluá e rekomendashonnan i informá gobièrnu na komienso di yüni tokante e desishonnan ku lo tuma enkuanto CMC.
Pa konkluí
Boso komo enfermero I enfermera ta hopi balioso den nos kuido, I semper lo ta.
Mi enfoke ta i lo keda pa huntu ku CMC keda tuma paso pa garantisá un kuido aksesibel i di kalidat pa tur habitante di Kòrsou. E enfoke aki ta suprayá e meta komun di tantu CMC komo Ministerio di GMN pa fortalesé salubridat na Kòrsou ainda mas.
Mi ta gradisi boso un biaha mas pa boso aporte den esaki, I semper nos lo keda konta ku boso apojo I kontribushon pa asina nos pashentnan I poblashon por keda konta ku boso.
Nos kurason ta keda bati pa tur trahado i pashentnan di CMC.
Pabien ku boso dia!
639114718427035"
639114718427035"

