Feid lo keda remplasá, Karchinan pa Hak’e Curaçao Summer Festival a sali
Feid lo keda remplasá
Karchinan pa Hak’e Curaçao Summer Festival a sali
WILLEMSTAD: Ayera mèrdia e tim di maneho di Hak’e Curaçao Summer Festival a duna un ’update’ na prensa referente e festival programá pa dianan 28 i 29 di yüni, 2024. Manchi Harms a hiba palabra i a anunsiá ku artista Feid lo no forma parti mas di e line-up pa 29 di yüni. E tim di maneho ta lamentá esaki, sinembargo tur fokùs awor ta pa finalisá e negoshashon i kontrato ku e artista ku ta djòin e line-up pa dia 29 di yüni próksimo. Ya tur energia a keda re-aliñá pa pronto anunsiá e artista. E impase ku agensia di Feid ta sigui su proseso legal. Riba e pregunta, ken lo remplasá Feid den e festival, e kabayeronan a kontesta unánimemente; “Mes òf Mas grandi”.
“E ophetivo di e tim di Hak’e Curaçao Summer Festival ta p’e fanátiko gosa for di ora e kumpra su karchi, te ora ku e bandoná e sitio di festival. Den 20 aña di eksperensia semper e punto di salida tabata pa ofresé kalidat”, asina Manchi Harms a komentá. Na e momentunan aki ta analisando ‘rider’ tékniko i di hospitalidat, presupuesto i logístika di e artista ku lo mester keda agregá n’e line-up pa djasabra. Manchi Harms ta sigurá fanátikonan ku den 2 siman, e nòmber nobo ta wòrdu anunsiá.
Tur otro artista p’e festival ta konfirmá! T’e asta a kompartí un video di Servando y Florentino ku a ekstendé invitashon na tur fanátiko pa dia 29 di yüni benidero. Djabièrnè dia 28 di yüni, ta konfirmá Olga Tañón, Tributo Al Merengue feat. Fernando Villalona, Wilfrido Vargas, Kinito Mendez y Orquesta i tambe Axel & Orchestra. Djasabra dia 29 di yüni, ta pa Servando y Florentino, NSTYPLY i aki 2 siman lo anunsiá e terser artista!
Karchinan early-bird ta sali djasabra dia 11 di Mei na tur punto di benta; Ticketpoint Zeelandia, 24 Uur uit de Muur, Vanddis Rio/Brievengat, Mensings Caminada i Van den Tweel. Pa informashon di VIP sekshon Balcony òf Platinum por tuma kontakto na: +5999-5209700. Pa mas informashon www.hakecuracao.com
