E GRAN KOMPOSITOR I MUSIKO BIBI GONET A BAI LAGA NOS

 

 

E GRAN KOMPOSITOR I MUSIKO BIBI GONET A BAI LAGA NOS

 

WILLEMSTAD – Direktiva di AMAK a tuma nota ku Golbert “Bibi” Gonet den oranan  tempran di awe mainta  a bai sosegá. Aunke nos ta konsiente ku durante último tempunan Bibi tabata tin kebrante di salud, pero nos ningun a spera ku e despedida lo a bini asina rápido.

 

Bibi Gonet ta un tremendo perkushonista i tambe un tremendo kompositor. Hopi di e komposishonnan eksitoso di e agrupashon musikal ERA kantá pa entre otro Boy Thode, ta kreashonnan di e gran músiko aki. Durante hopi aña  Bibi Gonet a forma parti di e agrupashon musikal ERA.

 

Bibi Gonet a demostrá su kapasidatnan musikal tambe komo kompositor durante Festivalnan Un Kanto pa Kòrsou, pero tambe su aporte Musikal den diferente komposishonnan ku a partisipá na Festival di Tumba.

 

Bibi Gonet tabata un músiko ku un karakter firme ku na momentu ku esaki ta nesesario, e ta trese su opinionnan  den un forma stret dilanti, ku despues ta resultá di ta opinionnan balioso pa logra un  produkshon final eksitoso.

 

Direktiva di AMAK ta deseá su mama, demas famia i su koleganan den músika hopi forsa ku e pèrdida sensibel aki. Farándula di Kòrsou no a spera ku Bibi Gonet lo a bandoná e mundu aki na un edat hóben.

 

Nos ta konvensí ku Bibi Gonet lo por konta ku un lugá den Reino Selestial.

 

Ku su alma sosegá na pas.

 

Direktiva di AMAK