Avila Beach Hotel ta selebrá su 75 aniversario ku un fiesta grandioso ku tema di “Great Gatsby”

 

WILLEMSTAD – Avila Beach Hotel, e hotèl mas bieu di Kòrsou, operashonal for di aña 1949, a selebrá su 75 aniversario, dia 1 di yüni 2024, den un estilo grandioso ku un fiesta espektakular ku tema di “Great Gatsby”. E dia memorabel akí ta konmemorá e dia na aña 1977, ora e doño anterior danés, Sr. Finn Nicolaj (Nic) Møller, a hasi atkisishon i un renobashon ekstenso di e hotèl, markando un momentu signifikante den e historia di e hotèl.

 

Un Entrada Grandioso

E anochi a kuminsá ku bishitantenan yegando ku uso di servisio di parkeo i invitadonan a hasi nan entrada riba un tapeit pretu luhoso. Parti pafó, e zonido enkantadó di CJ Opus riba violin a kuminsá ku e ambiente di e anochi. A risibí e bishitantenan ku un bebida refreskante i diferente aperitivo, siguí pa un bon biní di Gerente General, Robbin Vogels i su tim ehekutivo. Tabata tin un oportunidat spesial pa saka portret ku transfondo di Avila 75 pa keda komo rekuerdo.

 

Ante-sala

Den e área di ante-sala, bishitantenan por a kòmbersá i interkambiá riba e tononan di Avila su Blues band i artistanan invitá, mientras ta disfrutá di kòktelnan eksklusivo for di e bar di miksología, bar di koñak i delisianan apetitoso. A realsá e entorno ku áreanan di ‘lounge’ den esfera di temporada antaño, e Rolls Royce di Avila di 1926 i estatuanan bibu, tur den un dekorashon opulente di “Great Gatsby”.

 

E Evento Prinsipal

8 PM en punto, e evento prinsipal a kuminsá ku bailarinnan dirigiendo e bishitantenan pa e podio di konsierto. Roderick ‘Vader’ Volk, e MC di e anochi, a introdusí e ‘big band’ dirigí pa Randal Corsen, ku musikantenan lokal i un orkesta di 12 tokadó di instrumènt di arko for di Venezuela. E konsierto a habri ku un wals di Wim Statius Muller, siguí pa un diskurso di Minister Cijntje. Gerente General, Robbin Vogels a sera e promé parti ku un diskurso di kurason i un brindis ku shampaña, siguí pa e kansion “Danki” di Dibo D, akompañá pa un ekspektákulo di klapchi riba e tono di “Great Gatsby” su Rhapsody in Blue.

 

Un kombinashon perfekto ku ta kombiná ku e gratitut di Gerente General Robbin Vogels: “Avila ta un lugá masha spesial. Aunke hopi kos a kambia durante di aña, un kos ku a keda meskos ta: e magia di e lugá akí, su historia, i su lugá den nos sosiedat. Ora nos a atkerí e hotèl den 2015, nos enfoke prinsipal tabata pa preservá esaki. Mi ta hopi agradesido di por kompartí e 75 aniversario di Avila ku boso tur awe nochi. Sin boso, nos lo no a logra esaki. Loke nos a konstruí huntu i loke nos lo sigui konstruí ta algu di ta orguyoso di dje,” segun Robbin Vogels.

 

Presentashon Úniko

Despues di un pousa kòrtiku, e konsierto a kontinuá ku aktuashonnan vibrante di Christine Corsen, Dibo D, Aemy Niafeliz, Yumarya Grijt, Ephrem J, i Izaline Calister. E músika tabata variá, for di hitnan klásiko te faboritonan modèrno, sigurando asina ku tur hende tabata riba pia bailando. Bailarinnan a añadí na e ambiente festivo durante hinter e anochi.

 

Festividatnan Despues di Konsierto

Festividatnan despues di konsierto a inkluí bebidanan i bokados den e “lounge”, un skina di postre ku ‘cupcake’ ku tema di e aniversario, i kòfi for di Avila su trùk di kòfi. Tambe un skina di sigá. Komo un gesto di apresio, tur bishitante a risibí un tas di rekuerdo ku regalonan spesial.

 

Asistensia Diverso

E evento tabata bishitá pa un grupo diverso di sostenedor, inkluyendo suministradónan, reservadónan di evento, ofisialnan di gobièrnu, musikantenan, negoshinan den bisindario, residente, huéspetnan ku laso di largu tempu, i prensa. E selebrashon inolvidabel akí tabata un tributo digno na e historia riku di Avila Beach Hotel i su legado kontinuo komo un destinashon prominente na Kòrsou.

 

Akshon di Karidat den Promé di Febrüari

A marka e fecha aktual di e aniversario di Avila riba promé di febrüari ku e distribushon di 75 bolo na 75 organisashon i fundashonnan lokal, donashon di 750 kuminda na ‘Daily Meal Program’, i donashon di 75 paki di kuminda na Stichting Nieuw Nederland, distribuí pa e leyenda di bario Rensley Victoria.