Promé Minister sr. Gilmar Pisas a risibí e Sekretario general di Association of Caribbean States

Promé Minister sr. Gilmar Pisas a risibí e Sekretario   

general di Association of Caribbean States

 

Willemstad – Promé Minister sr. Gilmar Pisas a risibí e Sekretario General di Association of Caribbean States (ACS) sr. Rodolfo Sabonge dia 6 di yüni 2024.

 

Sr. Rodolfo Sabonge (Chairman of the ACS Ministerial Council 2023/2024, Ministry of Foreign Affairs, International Business and International Cooperation of the Republic of Suriname) tabata akompañá pa sra. Safiya Reid (Officer-in-Charge of ACS Directorate of Transport, Commerce and Sustainable Development).

 

Kòrsou ta miembro asosiá di ACS i debí na esaki e meta di e bishita tabata pa ACS su representantenan sera konosí ku Promé Minister sr. Pisas i alabes kompartí plan i ideanan pa ku kon fortalesé Kòrsou su partisipshon komo miembro asosiá di ACS, pa medio di proyekto i aktividatnan ku ACS ta brinda.

Tin e disponibilidat pa krea i risibí fondo pa esakinan tambe.

 

Durante e bishita a papia tambe riba diferente tópiko manera e plan stratégiko nobo di ACS , proyektonan nobo ku ta bai kuminsá i e importansha di traha huntu den región.

Pa ku e plan stratégiko nobo di ACS sr. Rodolfo Sabonge a indiká ku e enfoke pa ku e aña aki lo ta riba konektividat i kambio di klima.

Tambe sr. Rodolfo Sabonge a suprayá ku e ta sumamente importante pa  Kòrsou kuminsá hasi mas uso di tur e benefisio i oportunidatnan ku ACS ta brinda i tambe kuminsá partisipá mas tantu na e diferente reunion i konferensianan ku ta bai tin di ACS.

Komo miembro asosia di ACS Kòrsou tambe por bini ku proposishon riba temanan ku ta karesé di interesnan komun.

 

Komo miembro asosiá Kòrsou tin tambe e derechi pa intervení den e diskushonnan ku tin den e Konseho di Minister i e komishonnan spesial di ACS ora ta trata asuntunan ku ta regardá nos direktamente i ku ta kai bou di nos kompetensia konstitushonal.

 

ACS a keda lantá riba inisiativa di CARICOM na aña 1994 ku e ophetivo pa promové konsulta, koperashon i kordinashon di akshon entre tur e paisnan den Karibe.

Por bishitá e link aki pa por haña mas informashon riba ACS:

https://acs-aec.org/index.php?q=about-the-acs

 

Promé Minister sr. Pisas a keda sumamente kontentu i a gradisí sr. Rodolfo Sabonge pa tur informashon ku e la risibí i indika ku por spera mas di nos partisipashon den ACS.

Na final di bishita a tuma lugá entrega di un muestra di agredesimentu.