Gobièrnu di Boneiru Periodista Nicole Terborg a yega Boneiru pa un charla tokante yu sin doló

E periodista Nicole Terborg, un di e oradornan durante e anochi tokante yu si doló, a yega Boneiru riba djamars último. Terborg ta traha na Hulanda i den pasado el a traha un seri di podcast kaminda el a bai buska kontesta riba e pregunta dikon hopi tempu pasá nan a hib’é bai biba serka un tanta komo yu sin doló.

Biblioteka Públiko Boneiru, den kolaborashon ku ministerio di Enseñansa, Kultura i Siensia, dia 22 di yüni ta organisá un anochi kaminda diferente eksperto ta para ketu na loke nan a eksperensiá komo por ehèmpel yu sin doló òf komo mama di un yu sin doló. Durante e anochi akí nan ta para ketu tambe na e konsekuensianan emoshonal i mental ku un yu sin doló por eksperensiá, pa motibu ku no ta un mayor biológiko a eduk’é. E charla tokante yu sin doló ta tuma lugá riba djasabra 22 di yüni for di 19:00 or te 21:30 or na Corallium Hotel, anteriormente konosí komo Marriott Hotel. Entrada ta grátis i e sala ta habrí for di 18:30.

Riba e potrèt por mira e momentu kaminda Jennifer Pocornie-Martis, hefe di biblioteka, a bai topa Terborg na BIA. Di robes pa drechi: Jennifer Pocornie-Martis, Nicole Terborg i Glynnis Terborg, mènedjer di Nicole Terborg.