Bida nobo pa nos refnan: konosementu for di e tayer di restorashon ku a tuma lugá resientemente
Bida nobo pa nos refnan: konosementu for di e tayer di restorashon ku a tuma lugá resientemente
E siman akí Dutch Caribbean Nature Alliance (DCNA) a organisá un Tayer di Restorashon di Ref na Boneiru, kaminda mas ku 20 eksperto riba tereno di rekuperashon di ref di koral a bini huntu. E evento a enserá presentashonnan tantu personal komo virtual i a hala mas ku 150 partisipante. E tópikonan tabata varia di reprodukshon di piská te plantamentu di koral, loke a promové interkambio di konosementu i kolaborashon pa esfuersonan pa protehá e ref di koral.
Ref di koral ta brinda servisio di balor inkalkulabel na tantu bida den laman, komo na komunidatnan di hende. Nan ta fungi komo barera natural ku ta protehá kosta kontra eroshon i daño di mal tempu, miéntras nan ta sostené tambe e sektornan di peskeria i turismo ku ta di vital importansia pa ekonomia i bienestar di e área karibense.
Aparte di kambio di klima ku ta tumando lugá rònt mundu, faktornan lokal manera desaroyo no-regulá na kosta, maneho inapropiá di shushi i espesienan invasivo ta kontribuí na deterioro di ref di koral. Atendementu ku e problemanan akí, banda di esfuersonan pa protekshon i rekuperashon di ref ta esensial pa oumentá resiliensia di ekosistemanan di koral kontra faktornan di strès den futuro.
E puntonan ku a destaká mas durante e tayer
For di 17 te 19 di yüni e partisipantenan a asistí na vários charla i presentashon pa profundisá nan konosementu di téknikanan pa restorashon di ref. Ekspertonan di Reef Renewal Foundation Bonaire , Caribbean Research and Management of Biodiversity (CARMABI) i SECORE Internationala deliberá tokante e métodonan pa restorashon di koral. Coral Spawning Lab a kompartí e progreso riba tereno di téknikanan di reprodukshon di koral na tera. Van Hall Larenstein a deskribí restorashon di herbívoronan endémiko, manera seapel i kokolishi, ku ta yuda redusí alga dañino i mehorá sobrebibiensia di koral. Diergaarde Blijdorp (Roffareefs) a presentá aserkamentunan nobo pa reprodukshon di piská herbívoro. Banda di esaki MPAConnect/AGRRA a kompartí konosementu for di nan tayer di Coral Restoration Roadmap Planning (Planifikashon di Ruta di Mapa pa Restorashon di Koral) na Florida.
Siña den práktika
E tayer a enserá tambe vários aktividat práktiko den vèlt bou di guia di Reef Renewal Foundation Bonaire i Diergaarde Blijdorp (Roffareefs). E partisipantenan a okupá nan mes ku fragmentashon di koral i téknikanan mikro di reprodukshon, nan a studia e komportashon di bruimentu di piská i nan a partisipá na ehersisionan lokal di restorashon di ref. E kombinashon akí di trabou den klas i trabou den vèlt a hasi posibel pa e partisipantenan por a apliká nan abilidatnan riba proyektonan ku ta andando i proyektonan di futuro.
E kaminda padilanti
Ref di koral ta di importansia krusial pa salú di e islanan di Karibe Hulandes. Banda di e kambio di klima ku ta tumando mundialmente, problemanan lokal manera desaroyo no-regulá na kosta, maneho di shushi inadekuá i espesienan invasivo ta kontribuí na deterioro di ref. Atendementu ku e desafionan akí, protekshon i restorashon di ref ta esensial pa edifikashon di resiliensia kontra faktornan di strès den futuro. DCNA su Programa di Konservashon i Restorashon di Habitatnan Mas Importante (Conservation and Restoration of Key Habitats Program) ta invitá interesadonan den área karibense pa djòin e inisiativa krusial akí pa protehá biodiversidat, oumentá resiliensia di áreanan na kosta i sostené medionan di supsistensia sostenibel.
Keda na altura
DCNA ta bai publiká un edishon spesial di BioNews ku artíkulo i grabashon di algun presentashon tokante tópikonan di e tayer, ku ta ofresé konosementu profundo i amplia e konosementu ku a kompartí durante e evento. Pa mas aktualisashon, sigui DCN via Facebook, Instagram òf BioNews.
********************************************************************************





