KÒRSOU TA RISIBÍ 5 MULINA DI BIENTU NOBO

KÒRSOU TA RISIBÍ 5 MULINA DI BIENTU NOBO

Willemstad 3 di yuli 2024- Den un kolaborashon estrecho entre Aqualectra i NuCapital, Kòrsou ta risibí un total di (5) mulina di bientu nobo djaluna 29 di yüli próksimo, ku lo ta e fundeshi pa nos di 3 parke di mulina di bientu situá na Koraal Tabak. Promé ku yegada di e mulinanan akí, ya NuCapital a sinta ku Vestas (e kompania diseñadó di e mulinanan) i Ter Linden (e kompania enkargá ku e transporte) pa fiha un plan teniendo kuenta ku tur aspekto nesesario pa transporte di e mulinanan por kana seif i trankil for di nan yegada te ora esakinan yega nan destinashon final na Koraal Tabak. Servisio pa Obranan Públiko (UOOW) i Kuerpo Polisial a bai di akuerdo ku e plannan di transporte akí i lo tei pa hasi ahustenan nesesario riba nos kareteranan i kordiná tráfiko durante transporte. E mulinanan di bientu nobo ta yega ku barku na Brionwerf i pa motibu di nan kantidat i grandura, lo tuma masoménos 1 luna pa keda transportá kompletu pa Koraal Tabak.

Durante e proseso akí, ta importante tene kuenta prinsipalmente ku transporte di e partinan mas grandi di e mulinanan (manera por ehèmpel e pipanan largu i e chapaletanan) i e ahustenan ku mester tuma lugá na nos kareteranan pa e transporte por sosodé. Importante ta, ku durante henter e proseso di transporte akí, Kuerpo Polisial lo ta presente pa guia tráfiko i sòru ku tur kos ta kana trankil i ku ménos molèster posibel. E transporte inisial ta kuminsá mesora djaluna 29 di yüli for di e tereno di Brionwerf (tereno di Curaçao Ports Services (CPS) pa e tereno bashí kaminda ántes tabata Amstel riba Nieuwehaven i despues di un siman lo inisiá e transporte definitivo pa Koraal Tabak riba djamars, 6 di ougùstùs. Promé ku kuminsá ku e transporte ofisial pa Koraal Tabak, lo tin trabounan di preparashon ku ta bai tuma lugá dor di UOOW riba e ruta kaminda mester pasa ku e mulinanan durante transporte manera p.e hisa wayanan di telefòn i koriente i kap algun palu/mata riba e ruta. Djasabra 3 di ougùstùs for di 6’or di mainta e trùknan di transporte lo hasi un tèst di e ruta kompletu huntu ku UOOW i Kuerpo Polisial.

Pa transportá e diferente parti di e mulinanan, ta bai hasi uso di 2 tipo di trùk. E promé tipo di trùk lo ta ekivalente na un trùk di karga normal i lo uza esaki pa transportá e partinan mas chikitu di e mulinanan, miéntras e otro tipo di trùk mas largu lo usa pa transportá e pipa di e mulinanan i e partinan mas grandi. Prinsipalmente pa e trùknan largu ku ta transportá e partinan mas grandi di e mulinanan, lo mester bai hasi sierto ahuste di tráfiko na algun puntonan prinsipal riba e ruta; tantu saliendo di Brionwerf pa e tereno di Amstel, komo tambe e ruta di Amstel pa Koraal Tabak. A opta pa hasi e mayoria di e transporte ku e trùknan mas largu riba djasabra i djadumingu di 6’or pa 8’or di mainta i di 2’or di mèrdia pa 4’or di atardi pa purba evitá mas tantu molèster posibel pa tráfiko regular. Transportenan ku mester tuma lugá den siman, ta sosodé mas tantu posibel ku e trùk di karga regular entre 9’or pa 11’or di mainta i entre 2’or di mèrdia pa 4:30 di atardi.

Durante e transporte inisial for di CPS pa e tereno di Amstel dia 29 di yüli, lo kita parti di e vangrail temporalmente riba e kaminda di Nieuwe Haven na haltura di e fábrika di Coca Cola pa por fasilitá pasashi di e trùknan. Na momentu ku e transporte no ta tumando lugá, e espasio habrí den e vangrail lo wòrdu será ku barí te na momentu ku e parti aki di e transporte kaba.
Pa djamars, 6 di ougùstùs na momentu ku inisiá ku e transporte ofisial for di e tereno di Amstel pa bai Koraal Tabak, e trùknan temporalmente ta sali riba man kontrali for di e tereno di Amstel pa subi Schottegatweg Zuid direkshon pa Sta Rosa.  Tambe na e bògt skèrpi na altura di ‘Tap Maar In’, lo mester kita parti di e vangrail temporalmente durante transporte di e mulinanan. Pa un momento na e parti akí tambe di e transporte, e trùknan lo mester lora via man kontrali pa por pasa e bògt akí seif.

Un di e ahustenan di mas grandi ku lo tuma lugá den periodo di transporte di e mulinanan di bientu, ta na altura di e rotònde di Sta Rosa. Pa por fasilitá e momentunan ku e trùk largu ta pasa riba e parti akí, lo mester baha e haltura meimei di e rotònde i kita e bòrchinan di tráfiko temporalmente. Funshon di e rotònde ta keda normal pa públiko general durante dia i durante e orarionan ku trùknan tin ku krusa e rotònde ku e mulinanan di bientu polis lo sera e área i guia tráfiko.

Na altura di Toko Seru Pretu riba Kaya Hensley Meulens ta e último punto riba e ruta kaminda ta bai tin ahustenan temporal di tráfiko durante e dia i oranan di transporte. Aki, tambe e trùknan lo mester subi pa un ratu riba banda kontrali di e kaminda pa por baha e seru skèrpi. Pa mas tardá djaluna, 26 di ougùstùs, e trabounan di transporte lo mester ta kompletu i trabounan lo kuminsá pa restablesé kambionan ku a keda hasí riba nos kayanan públiko na e diferente puntonan riba e ruta.

E yegada i instalashon di e mulinanan di bientu akí ta un paso grandi den direkshon di energia di futuro pa Kòrsou. Energia muchu mas konfiabel, duradero i pagabel pa kada kas i negoshi den nos komunidat. Danki pa bo pasenshi i koperashon miéntras nos ta traha inkansablemente pa por alkansá esaki.
Porfabor trafiká ku koutela durante e periodo di 4 di yüli te ku 24 yüli próksimo si akaso bo ta usa e rutanan menshoná. Mas ku klaro, nos lo sigui tene bo informá di tur desaroyo importante durante transporte i instalashon di nos mulinanan di bientu nobo.