MEO, FEDERASHONNAN DI KOOPERATIVA I KOOPERATIVANAN A SELEBRÁ DIA INTERNASHONAL DI KOOPERATIVA 2024
DESAROYO EKONÓMIKO
MEO, FEDERASHONNAN DI KOOPERATIVA I KOOPERATIVANAN A SELEBRÁ DIA INTERNASHONAL DI KOOPERATIVA 2024
PUBLIKÁ RIBA 09 YÜLI 2024
Ku enfoke riba e metanan duradero pa 2030


Orígen di Dia Internashonal di Kooperativa
Selebrashon di dia internashonal di Kooperativa a kuminsá na aña 1923, i na 1995 el a keda proklamá ofisialmente pa Asamblea General di Nashonnan Uní. E fecha ta kai semper riba e promé djasabra di luna di yüli, pues e aña akí dia 6 di yüli.
For di 1995, International Cooperative Alliance (ICA) i Nashonnan Uní pa medio di un komishon yamá “Committee for the Promotion and Advancement of Cooperatives” (COPAC) ta skohe un tema pa e selebrashon di Dia di Kooperativa. E tema skohé pa aña 2024 ta: “Kooperativanan ta Konstruí un Mihó Futuro pa TUR”. Ku e tema aki ICA ta pidi pa kooperativanan rònt mundu mustra e kontribushon ku nan a duna den pasado i pa nan sigui duna nan kontribushon den presente pa yuda krea un futuro duradero. Tambe e ta pidi pa nan aselerá e implementashon di e metanan di Desaroyo Duradero esta “Sustainable Development Goals (SDG’s)” pa 2030. E implementashon di SDG’s ta algu ku ya pa hopi aña mundu ta enfokando riba dje i último añanan ICA tambe ta duna hopi atenshon na esaki.
MEO su kontribushon pa logra SDG’
Den su introdukshon virtual, Minister di Desaroyo Ekonómiko a dediká algun palabra tokante SDG’s i e kontribushon di parti di Ministerio di Desaroyo Ekonómiko (MEO) pa logra e metanan aki. El a para ketu na e echo ku Desaroyo Duradero ta parti di e esensia i kurason di empresanan kooperativo. Pa ku esaki Minister a indiká ku e balornan i prinsipionan di e modelo di kooperativa pa ku hasimentu di negoshi ta i por kumpli ku e nesesidatnan i aspirashon di e hende riba áreanan ekonómiko, sosial i ekológiko

Relashoná ku esaki MEO konhunto ku e sekretariado di SDG’s ku ta resortá bou di Minister di Asuntunan General pa 4 aña kaba ta organisá SDG Action Week den luna di sèptèmber ku hopi éksito. Durante di e siman aki ta interkambiá riba diferente tópiko relevante i riba inisiativanan positivo pa ku SDG’s na Kòrsou.
Minister a konkluí su introdukshon invitando tur presente pa para ketu na e Dia Internashonal di Kooperativa e aña aki i tambe e dianan despues ku lo sigui pa nos promové e mentalidat di un Ekonomia Solidario i krea e konsientisashon pa ku e importansia di nos kontribushon na implementashon di SDG’sna Kòrsou.
Albert Martis a kuminsá su presentashon ku palabranan di e director general di ICA America tokante di e SDG’s. Pa seguidamente duna un presentashon amplio a base di SDG#13 Akshon di Klima. Ela mustra e relashon entre kooperativanan, desaroyo duradero i kambio di klima komo un punto di preokupashon Sr. Martis a presentá diferente krisis mundial i e kosto finansiero kousá pa kambio di klima, tambe kon mester aserká e krisis aki a base di un meta komun nashonal.
Direktor di FEKOSKAN den su spich a papia tokante e ròl di kooperativanan, prinsipalmente esnan di Spar i Krédito. Elaindiká dikon nan ta importante pa nos komunidat i pa logra e metanan di SDG. Tambe ela mustra ku mester tin un mihó kooperashon entre e diferente tiponan di kooperativanan. Mas aleu, ela indiká tambe e ròl ku Gobièrnu tin i a informá ku e kooperativanan di Spar i Krédito ta kla pa yuda.
Na final e presidente di FKUP, sr. Lucas a splika ken i kiko ta FKUP, e vishon i mishon di FKUP. Tambe ela splika kua ta e trabounan ku FKUP a hasi for di aña 2019 ku ela keda establesé te ku awor i tokante e instansianan lokal i internashonal ku kua FKUP tin relashon di trabou. Por último ela splika tambe e retonan ku ta FKUP ta keda konfrontá kuné.
