Pèchi Portugues ta sigui presente
den nos awanan den área di Banda Bou

A sera playa di Lagun temporalmente pa motibu di presensia di Pèchi Portugues

Willemstad – Resientemente un bishitante di playa di Lagun a bini den kontakto ku e tentákulonan di Pèchi Portugues. E persona a keda di tal manera afektá ku e mester a bishitá su dòkter di kas pa tratamentu. Eksaktamente un siman pasá Ministerio di Salubridat, Medio Ambiente i Naturalesa a saka un komunikado kaba pa atvertí personanan ku ta bishitá nos playanan e dianan aki, prinsipalmente na parti sùit ,esta na e playanan di Banda Bou pa tene kuenta ku posibel presensia di Pèchi Portugues. Mayornan òf gruponan di plan di vakashon ku riba e último dianan di vakashon di skol aki ta bishitá nos playanan ku e muchanan mester paga bon tinu ku e Pèchi Portugues aki.

Tur aña den e temporada aki ku kambio temporal di bientu i òf koriente di laman, e organismo marino aki por drif yega nos kosta. E forma di e Pèchi Portugues ta di tal manera ku e ta move den laman den direkshon ku bientu ta supla. E ta relativamente fásil pa mira den laman komo por rekonosé na su forma di un blas òf saku di plèstik lila yená ku airu di mas o ménos 25 centimeter ku ta drif den laman. Si bo mir’é, keda leu, no buska manera di sak’é for di laman. Su tentákulonan bou di laman por alkansá mas ku 30 meter. Si bo bini den kontakto ku su tentákulonan, kita restante di tentákulo ku keda riba e kueru sin grawat’é, laba e kueru ku awa di laman i apliká awa lou riba e área afektá. Tambe por apliká binager regular slap (1 pa 2 dòpi den 2 liter di awa) riba e área afektá. Si e área afektá keda kima òf hasi doló intenso, pone eis riba dje i bishitá bo dòkter di kas.