E chèns pa kasonan di Mpox, ántes konosí komo viruela di makaku, ta hopi chikitu na Boneiru. Pa mas sigur departamento di Salubridat Públiko ta tene kuenta ku e chèns ku biaheronan for di eksterior por bin ku e vírùs. Esaki ta parti di e tareanan ku e departamento tin pa protehá salú di siudadanonan. Pa e motibu akí departamento di Salubridat Públiko a informá empleadonan di kuido tokante e kehonan den kaso di kontagio ku e vírùs di Mpox. Di e manera akí por rekonosé e malesa rápidamente i por tuma medida pa evitá plamamentu.

Transmishon di Mpox ta tuma lugá pa medio di kontakto estrecho ku un persona kontagiá. Debí na Mpox a surgi un situashon di emergensia na Afrika, asina e Organisashon Mundial di Salú WHO a duna di konosé. E malesa ta plamando prinsipalmente den Repúblika Demokrátiko Congo i su paisnan bisiña. Aktualmente ainda nan ta investigando kon serio e kasonan di Mpox na Afrika ta.

Tin un chèns ku biaheronan for di áreanan kaminda tin Mpox ta hiba e malesa pa otro país. Na Oropa te ku awor tin un (1) persona ku Mpox na Suesia. E persona akí a keda kontagiá na Congo. Na Hulanda, Merka i Latinoamérika te ku awor no a topa ku niun kaso di Mpox. Mayoria di e biaheronan pa Boneiru ta bin for di e paisnan ei.

Departamento di Salubridat Públiko ta tene e situashon na Boneiru bon na bista. Na momento ku tin desaroyo nobo, mesora ta informá habitantenan.