Ministerio di Hustisia Ta Aktivo pa Solushoná Problemanan Konstatá
Willemstad – Den reakshon riba preokupashonnan resien tokante e efektividat di Ministerio di
Hustisia ku ta trata diferente reto den kadena di hustisia, e ministerio ke laga sa ku
efektivamente tin medida ku ta tuma pa solushoná e problema ku a konstatá. E rapòrt di Raad
voor de Rechtshandhaving, ku ta evaluá e situashon di e rekomendashonnan biniendo di
investigashonnan anterior, ta inkluí dato balioso i ta mustra ku e ministerio ya ta aktivo den
diferente área.
Siguimentu i Medidanan
Den e periodo for di 2011 pa 2023, mas di sinkuenta rapòrt di inspekshon a wòrdu publiká
tokante diferente parti di e kadena di hustisia na Kòrsou. E rapòrt aki ta duna un resúmen di e
situashon aktualmente riba kon ta efektuá e rekomendashonnan ku a wòrdu hasi pa e Raad.
E Raad a konkluí ku den algun kaso, manera na Ministerio Públiko i Wardakosta, un progreso
signifikante a keda lográ. Asina, mas ku 70% di e rekomendashonnan na Ministerio Públiko a
wòrdu sigui. Pa Wardakosta, paso importante a tuma riba e área di interkambio di
informashon i kapasidat operashonal.
Falta di Personal i Fondonan
E ministerio ta rekonosé ku tin opstákulo, prinsipalmente den área di personal i fondo
finansiero, ku a tarda e implementashon di algun rekomendashonnan. Pero tin medidanan ku
ta wòrdu tuma pa solushoná e problema akí. Manera ta konosí kaba den luna di mart 2024,
Ministerio di Hustisia a organisá un Job Fair kaminda tabatin vários vakatura habri pa kada un
di e organisashonnan den e kadena hudisial. Algun di e organisashon ya kaba a yena e
funshonnan ku tabata bashí.
Ademas, e ministerio ta traha riba e leinan i reglamentonan nesesario ku mester
strukturalmente fortifiká e operashonnan di Landsrecherche i otro parti di hustisia.
Monitoria i Rapòrtnan Kontinuo
Un paso importante den e proseso di mehorá ta e formashon di un grupo di trabou ku tin e
tarea pa implementá e rekomendashonnan. E grupo akí, formá ku miembronan di Korps
Politie Kòrsou (KPC), kabinèt di minister di Hustisia i trahadónan di maneho di ministerio, ta
raportá regularmente riba e progreso. E rapòrt akí ta hasi sigur ku tin un kontrol ku atenshon
riba e implementashon di e medidanan di mehorashon.
Akshonnan pa Futuro
E ministerio ta kontinuamente invertí den oumentá e efektividat i kalidat den e kadena
hudisial pa medio di intensifiká formashon, fortifiká e empleado riba su abilidatnan i
implementá teknologia moderno. Un gran parti di e medidanan akí ta inkluí den e plannan di
largu plaso ku a ser aprobá resientemente. Tambe, fondonan adishonal ta reservá pa
proyektonan urgente manera renovashon di e infrastruktura di Justitiële Jeugdinrichting
Curaçao.
Konklushon
Ministerio di Hustisia ta konfirmá ku ta traha ku seriedat i responsabilidat riba e
rekomendashonnan di e problema ku a konstatá. Apesar di e reto, e ministerio ta determiná pa
logra loke mester keda mehorá den e kadena hudisial. E kooperashon ku organisashonnan i
sosionan relevante lo intensifiká den e lunanan ku ta bin, pa logra mas progreso.