Victory Boys a yega Aruba pa ranka sali ku Licensia D US Soccer
Victory Boys a yega Aruba pa ranka sali ku Licensia D US Soccer
Willemstad – 23 Sèptèmber 2024,
Awe mahinta un delegashon di entrenadó di SV Victory Boys a biaha pa Aruba, pa djòin entrenadó di SV Flamingo i RCA Aruba ku e delaster tramite di e lisensia ‘US Soccer D License”. E prome stap pa drenta e ‘prof coaching pathway di US Soccer’
Tur lisensia di US Soccer ta rekonosé pa Concacaf i FIFA ta marka un paso signifikante pa desaroyo di entrenadónan di futbòl riba e islanan ABC. E kurso, ku normalmente ta dura 6 luna a ser adaptá spesialmente pa e islanan ABC i asina lo duna e 26 entrenadónan ku a registrá e oportunidat pa kompletá esaki den un periodo mas kòrtiku.
Dor di e kolaborashon ku ‘US Soccer Education’, klupnan aliado tambe a logra optené dos lugá pa islanan ABC den kada kurso di Lisencia C ku ta hopi kerí na Merka. E lisensia C tin solamente 100 lugánan disponibel na Merka. E oportunidat aki ta un paso importante pa esnan ku tin ambishon pa bira entrenadó profeshonal i ta dunanan un kaminda (pathway) unda por sigui desaroyá nan abilidatnan di entrenadó.
E entrenadónan a ranka sali mes ora ku lès intensivo. Di 23 pa 27 di sèptèmber di 8:00 am te 8:00 pm, e dos ‘coaching educators’ di US Soccer, Kostas Hatzikoutelis I Mario Garcia Carvajal lo duna un lès di teoria siguí pa lès di práktika riba vèlt.
“E dianan aki lo ta hopi intensivo pa nos entrenadónan i ta hopi ‘great’ ku ya kava nos ta nota e desaroyo di nos nivel di coach danki na e edukashon i e material di US Soccer. Coaching’ tambe a kambia, modernisá i profeshonalisá. Nos ta hopi orguyoso ku huntu ku nos ‘ABC Alliance’ ku RCA i Flamingo, nos por a logra pa duna nos entrenadónan e oportunitdat aki. Nos ta hinsa e nivel di e entrenadónan, ku tambe lo kontribuí na hinsa e nivel di hungadó, i desaroyá nos futbòl mas i mas.” Hassnah Elhage, presidente di Victory Boys a deklará.
Victory Boys huntu ku ‘coach’ Mario i Kostas.
Partisipante di Kòrsou:
Gedeon Sambo
Benjamin Davelaar
Engelmar Marceli
Gidion Martina
Hassnah Elhage
George Hojer
Luidjino Hojer
Sheila Elhage
Victory Boys, rumbo pa Aruba pa djòin RCA I Flamingo pa lisensia D di US Soccer.
Mario Garcia Carvajal di US Soccer, Jeff Lopez (presidente di RCA), Hassnah Elhage (presidente di Victory Boys), (Terrence da costa Gomez, vise presidente di SV Flamingo, i Kostas Hatzikoutelis di US Soccer.
Entrenadónan di e tres ekipo a ranka sali mes ora ku un dia intenso di seminario.