PARTIDO MEP CU ENTRADA MASAL DEN NOORD

 

 

Partido MEP:

 

Danki na e comunidad di Noord pa e caluroso recepcion

PARTIDO MEP CU ENTRADA MASAL DEN NOORD

 

ORANJESTAD – Diasabra ultimo, Partido Movimiento Electoral di Pueblo MEP a haci un entrada masal den e bario di Noord, na unda cada candidato a forma su ekipo pa pasa den diferente bario pa saluda y pa laga un “flyer” cu informacion di maneho y logronan di Partido MEP den gobierno.

 

Tambe a tuma e oportunidad, mirando cu e siguiente encuentro di Ban Topa lo ta den e bario di Noord, di laga un invitacion pa e comunidad completo di Noord, pa asisti na e encuentro aki cu lo tuma luga diamars 8 di october cuminsando di 6:30 pm – 9 pm na Club Don Bosco na Noord.  Candidatonan cu lo duna un presentacion riba e anochi aki ta Lider di partido Evelyn Wever-Croes, Michella Steenvoorde-Lacle, Ricky Hoek, Dangui Oduber, Endy Croes, y Marco Berlis. Esaki lo ta un oportunidad pa e comunidad di Noord scucha di e trabounan cu a wordo realisa den e ultimo añanan, e plannan pa cu e proximo gobernacion, y alabes haci preguntanan den caso di cualkier preocupacion.

 

Mester bisa cu e recepcion durante e entrada masal pa cu e candidatonan di partido MEP, tabata uno exitoso. Hopi ta e casnan cu a habri nan porta pa duna un bon bini na e ekipo y e candidatonan, cu na su turno a saluda, combersa y adresa cualkier preocupacion cu lo por tabata tin.

 

Partido MEP ta gradici e comunidad completo di Noord pa e caluroso bon bini, y ta spera di por conta cu nan sosten pa cu e eleccion dia 6 di december proximo.

 

Pa culmina un fin di siman exitoso, partido MEP a tene un “sticker actie” na cede di MEP, na unda a ricibi varios persona cu ta desea di pega un sticker riba nan vehiculo. Partido MEP lo sigui cu e movecion den cada bario y cu mas “sticker actie” den e proximo fin di simannan.