Servisio di Salubridat Públiko di Ministerio di GMN ta sigui kombatí sangura den área di Piskadera pa redusí molèster pa habitantenan

Servisio di Salubridat Públiko di Ministerio di GMN ta sigui kombatí sangura den área di Piskadera pa redusí molèster pa habitantenan

Willemstad – Ministerio di Salubridat, Medio Ambiente i Naturalesa ta partisipá ku su servisio di Salubridat Públiko (ántes GGD) ta sigui kombatí e molèster di sangura pa habitantenan di área di Piskadera i Charo. Kolaboradónan di THZ (Technische Hygiënische Zorg) ya a flit e área i pa awe tardi lo bolbe pasa den bario ku e vehíkulo ku ta flit. Di e manera aki THZ ta sigui kombatí e foko di sanguranan ku ta okashoná hopi molèster pa habitantenan..

Pa awe entre 5’ or di atardi i 8’ or di anochi servisio di THZ lo flit atrobe den área di Piskadera i Charo. Ta konsehá habitantenan pa momentu ku e vehíkulo di flit pasa den nan kaya pa sera bentana i portanan di kas. Habitantenan ku ta kria para mester tapa e kouchi òf pone esakinan paden. Tambe lo hasi uzo di BTI kual ta un produkto orgániko spesial pa tira den awa kaminda tin foko di sangura pa eliminá e larvanan. Ministerio di GMN ta pidi habitantenan di Piskadera i Charo dikulpá pa kualkier inkumbiniensha ku e trabounan di kombati sangura por trese kuné.