Final di Temporada di Orkan 2024
Final di Temporada di Orkan 2024
Temporada di Orkan 2024 ta yegando na su fin i tabata un temporada bastante aktivo, ku un kantidat di 18 siklon tropikal ku a logra forma.
E temporada di orkan a kuminsá ofisialmente 1 di yüni i ta terminá 30 di novèmber. Den mayoria kaso riba Osean Nort-Atlántiko, un disturbio òf ola tropikal ta intensifiká i bira un siklon tropikal. Na e momento aki e sistema ta haña un nòmber ku bientunan birando rònt di un sentro di preshon abou.
Segun e sistema sigui intensifiká, esaki por keda klasifiká komo un orkan di varios kategoria (kategoria 1 te 5). E temporada aki a desaroyá na tur 18 sistema tropikal, di kuá 11 a sigui intensifiká i bira orkan, miéntras 5 di nan a alkansá e forsa di un orkan mayó. Eventualmente a konsiderá e temporada, unu di ta serka di e averahe, pa lo ke ta e kantidat di siklonnan.
E faktor ku a hunga un papel mas importante den formashon di siklonnan e aña aki tabata e temperatura di laman elevá di tantu Osean Atlántiko, Laman Karibe komo e Golfo di México. Entre otro tambe e bientunan den nivelnan mas haltu di atmósfera den transkurso di tempu a keda un poko suak.
E uniko sistema ku tabata di interes pa Meteo Kòrsou durante e Temporada di Orkan 2024 tabata Orkan Beryl. E sentro di Beryl a move na un distansha di mas o menos 330 kilometer nortost di Kòrsou. Pa e motibu aki Meteo a emiti mensahenan klave pa asina mantene pueblo di Kòrsou bon informá. Mas aleu Meteo a emiti un vigilansha pa posibel laman brutu ku Orkan Beryl por a okashoná na nos kostanan.
Servisio Meteorológiko, komo e outoridat pa dil ku menasa di sistemanan di naturalesa, ta monitoreá e wer den nos region i ta saka atvertensia ora ku esaki bira nesesario, pa informá i konsehá outoridatnan i tim di kalamidat e pasonan ku pais lo mester tuma.
Finalmente Departamentu Meteorológiko ke a gradisí e komunidat en general pa a sigui e konsehonan duná i asina huntu yuda protehá bida i propiedat durante e periodo aki.
Por sigui nos boletinnan a traves di nos website (http://www.meteo.cw), nos página di Facebook (http://www.facebook.com/Meteorological.Department.Curacao/.), nos app Curacao Weather i tambe via di WhatsApp (+5999-560-1089).
