Fundashon Vishon Banda Bou (VIBA) enkargá ku Karnaval Banda Bou 2025 – 2027
Fundashon Vishon Banda Bou (VIBA) enkargá ku Karnaval Banda Bou 2025 – 2027
Instalashon di “Task Force Karnaval Banda Bou 2025”, pa ehekuta e tareanan organisatorio.
Kòrsou, 19 di dezèmber 2024
WILLEMSTAD – Ku sumo plaser, Fundashon Vishon Banda Bou (VIBA) ta aseptá e reto pa organisá Karnaval Banda Bou 2025-2027, despues di a gana e destaho públiko di Gobièrnu di Kòrsou, ku a tuma luga dia 9 di dezèmber último.
Fundashon VIBA semper ta sali na banguardia di Banda Bou i durante di añanan a hasi esaki di diferente forma. Ku meta por engrandesé i inová e Karnaval di Banda Bou, Fundashon VIBA a haña ku ta imperativo pa partisipá na e destaho públiko.
Rekonosiendo e importansha di inklushon i representashon di profeshonalnan di Banda Bou pa e tarea aki, VIBA a instituí di imediato un komishon dediká na ehekushon di e aktividat aki pa Banda Bou.
“Task Force Karnaval Banda Bou 2025” a wòrdu instalá komo un ekipo di liderasgo kombiná konsistiendo di profeshonalnalnan responsabel di diferente parti di Banda Bou, ku eksperensia organisatorio di eventonan eksitoso. E siguiente personanan a pone nan mes disponibel pa karga e plannan pa Karnaval Banda Bou 2025:
Selfrin (Fanny) Sambo / Erickson Vicario / Stephanie Smits / Shurney (Nello) Pisas / André Rojer / Nayseline Jamanica / Heinrich (Rich) Pieter / Jhonny Roojer / Eugene Goedgedrag
“Task Force Karnaval Banda Bou” ta refleha un union i kolaborashon entre Fundashon VIBA, “Kòrsou den Pabou”, Fundashon Desaroyo Karnaval Kòrsou (FDKK), Task Force Embahadornan di Karnaval i varios lidernan di bario i organisashonnan den Banda Bou; kual lo sòru pa kontinuashon di e tradishon kultural karnavalesko den un forma inovativo i di kalidat.
Tempu ta kòrtiku pa tur loke e Task Force lo ke logra pa Karnaval Banda Bou. Pero pa e aña 2025, prioridatnan di “Task Force Karnaval Banda Bou 2025” lo bai ta:
- Un temporada di karnaval kreativo ku aspektonan inovativo.
- Un marcha ku por lo minimo 5 grupo nobo di Banda Bou.
- Un komienso di un era nobo pa un Karnaval di Banda Bou.
Ademas di e prioridatnan aki, “Task Force Karnaval Banda Bou 2025” ta komprometé pa organisá un Marcha di Banda Bou 2025 di kalidat, eksitoso, inklusivo i ku ta reflehá e kultura vibrante di e isla tresiendo nos komunidat huntu.
“Task Force Karnaval Banda Bou 2025” ta hasi un yamada na komersiantenan di Banda Bou pa aliá ku nos, i sostené e intenshon i planesnan di e organisashon, i ademas ta invita boluntarionan di Banda Bou pa duna un aporte ku e preparativosnan pa un marcha eksitoso dia prome di mart 2025. Pa keda informa, bishita nos FaceBook i pa mas informashon email nos na taskforcekarnavalbandabou@gmail.com
