KUERPO POLISIAL KÒRSOU

KOMUNIKADO DI PRENSA

30 desèmber 2024

531/2024

Dos detenshon pa violensia relashonal, maltrato, destrukshon i menasa

Djadumingu 29 di desèmber 2024 alrededor di 18.18’or, Sentral di Polis a dirigí un unidat
polisial na Wageningenstraat, pa un kaso di violensia relashonal.
Na e sitio e dama habitante a splika polis ku e tabatin un diskushon ku su partner. Despues
di e diskushon e partner a destruí tur kos den kas i tambe maltrata tantu e komo su mama.
Durante ku e partner tabata maltratando nan, un familiar a sali na defensa di e dama i su
mama.
A start un bringamentu entre e familiar i e partner. Durante di e bringamentu e familiar a
kap e partner di e dama ku un machete na altura di su kabes.
Na e sitio polis a detené e hòmber O.S.C.J. di 21 aña di edat nasé Repúblika Dominicana,
pa maltrato, destrukshon, menasa i tambe a konfiská un machete i un kuchú. A transporta
e sospechoso pa Sala di Emergensia di C.M.C. pa tratamentu médiko. Despues di
tratamentu médiko a presentá e sospechoso dilanti di un fiskal ouksiliar, ku a ordená su
enkarselamentu pendiente di mas investigashon. Algun ratu despues e familiar R.S.M. di 43
aña nasé na Repúblika Dominicana, a entregá su mes na warda di Reshèrshi. A presentá e
sospechoso aki tambe dilanti di un fiskal ouksiliar, ku a ordená su enkarselamentu
pendiente di mas investigashon.