ARUBA: 𝗛𝗼𝘀𝗽𝗶𝘁𝗮𝗹 𝗳𝗲𝗹𝗶𝘇 𝘁𝗮 𝗮𝗻𝘂𝗻𝗰𝗶𝗮: 𝗕𝗮𝗯𝘆 𝗱𝗶 𝗮ñ𝗮 𝟮𝟬𝟮𝟱 𝘁𝗮 𝗠𝗮𝗱𝗲𝗹𝗲𝗶𝗻𝗲 𝗗𝗲𝗹𝗴𝗮𝗱𝗼 𝗚𝗼𝗺𝗲𝘇 

Aruba completo ta pendiente manera semper pa e prome baby di aña. Un tradicion cu tin años di existencia y claro Hospital y su personal felizmente ta warda yegada di ken lo bira e prome baby pa aña 2025. Aña 2022, 2023 y 2024 tabata baby mucha homber y e aña aki Aruba ta yama bon boni na e prome baby di aña cu ta un baby mucha muhe cu a haya e bunita nomber Madeleine.

Pa exactamente 12.36 di marduga net despues di tiro mama Magnolia Fingal a ripara cu su awa a kibra y pues a prepara pa bay Hospital hunto cu su pareha Miguel Jose Delgado Gomez. Mama Magnolia tabatin ya un operacion cesarea planea cu ginecologo pa tuma luga aki 3 siman pero baby Madeleine a didici diferente. Nan a yega Hospital y team di Maternidad a cuminsa prepara pa asina e operacion cesarea tuma luga durante oranan di mainta. Pa exactamente 10or di mainta baby Madeleine Johainny Delgado Gomez a nace den camber di operacion di Hospital unda ginecologo Garcia hunto cu team di camber di operacion tabatin e honor pa yama bon bini na baby di aña 2025.

Un momento di alegria pa famia completo mirando cu ya mami Magnolia y papi Miguel Jose tin 3 yiu homber y finalmente a logra haya nan princesa. Baby Madeleine ta pisa 2920 gram y tin un largura di 51 centimeter.

Team di HOH tabata presente hunto cu sr. Jacco Vroegop, presidente di Hunta di Directiva di HOH unda e la felicita mami Magnolia y papi Miguel Jose cu baby di aña 2025 Madeleine ya. Desea nan hopi felicidad cu e yegada di nan baby mucha muhe. Alabes a dune un regalito di parti di HOH cu sigur baby Madeleine lo por haci bon uzo di dje.

Mami y papi ta super feliz cu nan baby ta saludabel y ta gradici dr. Garcia y ful e team di maternidad pa e guia durante henter e proceso prome y despues di e nacemento.

Team di HOH ta felicita famia y Aruba cu baby di aña 2025 y alabes ta desea un y tur un prospero y saludabel 2025 yena felicidad y amor y corda cu si bo mester di nos, nos semper t’ey!