KAYA KAYA TA ORGANISÁ E PROMÉ MERKADO AMOR PA OTROBANDA

 

 

KAYA KAYA TA ORGANISÁ E PROMÉ MERKADO AMOR PA OTROBANDA

 

Willemstad – Kaya Kaya ta organisá su promé di un seri di merkado titulá Amor pa Otrobanda.

E merkado ta tuma lugá djasabra 1 di febrüari di 4’or di atardi pa 10’or di anochi i lo konsentrá na ofisina prinsipal di Kaya Kaya den Breedestraat Otrobanda, rondó di viadukto bai e plenchi di e lugánan di parker patras di stashon di bus. Durante e merkado lo tin bendementu di kuminda, kos di bebe i otro artíkulo i produktonan, lo tin un área pa mucha, un kas di arte ku diferente artista, músika i un variashon di aktividat pa hinter famia. E Merkado Amor Pa Otrobanda ta e promé paso pa kreá un movementu ku ta aktivá Otrobanda fuerte henter aña. Akseso pa e merkado ta liber.

 

Despues di un periodo di evaluashon i preparashon Kaya Kaya ta bini ku un konsepto i struktura nobo i lo organisá aktividatnan mensual tantu pa komunidat komo turistanan. E merkado ta un oportunidat pa pone Otrobanda mas tantu den lus lokal i internashonal, ta duna un boost pa e komersiantenan den e área i hasi esaki mas atraktivo. Pronto Kaya Kaya Movement lo anunsiá su kalènder di aktividat, proyekto i otro eventonan pa aña 2025 i plan di mas aña.

 

Pa lansa e Merkado Amor pa Otrobanda a haña sosten di Cultuurparticipatie, The Freedom Hotel i CTB. Otrobanda ta warda bo djasabra awor pa pasa un atardi i anochi plasentero den un ambiente ku ta pas ku e tema, Amor pa Otrobanda. Di e forma aki Kaya Kaya ta spera di por sigui atraé mas bishitante pa un di e barionan ku mas a desaroyá den último añanan i a bira popular entre siudadano i turistanan.