ENSEÑANSA DEN KUIDO INTENSIVO DOSENTE KALIFIKÁ TAMBE TA KOS SERIO

 

ENSEÑANSA DEN KUIDO INTENSIVO

DOSENTE KALIFIKÁ TAMBE TA KOS SERIO

Willemstad, Kòrsou – Kalidat di enseñansa pa nos muchanan na Kòrsou ta kai i lanta ku maestronan bon prepará i ku rekursonan moderno pa por pasa konosementu i abilidat i guia formashon di nos hendenan. Un reto ku ta aparentá di nos a haña e atenshon nesesario ultimo añanan ta e skarsedat di maestronan kalifiká i e rekursonan nesesario pa enseñansa por a avansá

Resientemente, gobièrnu a kompartí e rapòrt titulá “Kansengelijkheid in het Curaçaose Onderwijs” (Igualdat di Oportunidat den Enseñansa na Kòrsou), ku ta enfoká riba e estado aktual di e sistema di enseñansa na Kòrsou. E informe ta enfatisá e importansia di krea oportunidatnan di enseñansa igual pa tur i mehorá e kalidat di enseñansa na Kòrsou. Promé ku esei e mesun gobièrnu a tuma un tempu largu pa laga hasi e asina yamá “nul-meting”. Tur esakinan mientras e ministerio di Enseñnsa, Siensia, Kultura i Deporte tin e obligashon di saka un relato anual riba estado di enseñansa, kaminda e retonan ta keda kompartí. Traha rapòrt riba rapòrt definitivamente no ta solushoná e probleman: Mester di akshon duradero urgente.

E skarsedat signifikante di maestronan kalifiká den skolnan rònt Kòrsou ta alarmante. E problema aki no ta afektá e kalidat di enseñansa so, sino tambe ta stroba e desaroyo di alumnonan, partikularmente esunnan den enseñansa spesialisá i vokashonal.

Komo un èks-maestro, mi a eksperenshá personalmente kon difísil e situashon na skolnan ta.   Maestronan ta luchando ku klasnan ku un kantidat di mucha i no por dediká sufisiente atenshon na muchanan ku mas mester. Falta di rekursonan ta pone ku maestronan ta bai saku pa por kumpli ku nan tarea. Eksigenshanan haltu ku muchanan mester kumpli kun’é den algun kaso ta inesesario, ku ta pone ku muchanan ta kai atras òf dropout. Bou di e kondishonnan ei, maestronan- apesar ku a drecha algun kos- ainda tin salario relativamente abou, sigur mirando e subimentu eksplosivo di kosto di bida. Tambe falta oportunidatnan pa kresementu profeshonal ta yuda demotivá varios dosente. Esaki ta impaktá abilidat di maestronan pa duna alumnonan e mihó edukashon posibel. Ta bon konosí ku algun ta bandoná Kòrsou i bai sea Hulanda ò Boneiru ku ta ofresé mihó salario, mas rekurso i mas oportunidat pa nan kresementu profeshonal.

P’esei MAN-PIN ta mira e ensesidat i a pone enseñnsa den su agènda di urgensha pa por lo menos den e promé 100 dianan start ku e siguiente solushonnan:

• Drecha salario i kondishonnan di trabou pa hasi e profeshon mas atraktivo i kompetitívo. MAN-PIN ta konvensí ku e trabou di maestro di skol ta mes noble ku esun di polis i ta konvensí ku mester bin salarionan i kondishonnan ku por kompetí ku esei i ku esnan di hermana isla Boneiru.
• Introdusi programanan di entrenamentu i oportunidatnan di enseñansa kontinuo pa ekipá maestronan ku e abilidatnan nesesario pa edukashon moderno. Bòrchi ku krèit mester traha lugá pa pantaya interaktivo konektá ku mundu. Parti di esaki ta tambe inklushon di naturalesa den kurá di skol- spesifikamente plantamentu di palu- pa yuda kombatí e konsekuenshanan di kambio di klima i alavase hasi skolnan mas agradabel kompara ku e betòn i asfaltnan aktual.
• Fomentá un kultura di trabou saludabel ku klasnnan ku kantidat di muchanan manehabel.
• Invertí den desaroyá programanan spesífikamente dirigí na trein maestronan pa enseñansa speshal, enseñansa tékniko i entrenamentu vokashonal. Den e programanan mester inkluí formashon di muchanan mas tempran posibel pa por kumpli ku nesesidatnan empresarial I trabounan di awe i di futuro.
• Solnan den bario mester bira mutifunshonal- p.e. lès pa adulto den oranan di atardi i aktividatnan di deporte, arte i kultura- tambe di moda ku habitante i mayornan ta sinti ku skol den bario ta di nan tambe. Esaki ta kontribuí na sosten ku maestronan mester di habitante i mayornan pa yuda kalidat di enseñansa i formashon di henter komunidat.

MAN-PIN ta konvensí ku edukashon ta e fundeshi di nos sosiedat. Invertí den nos maestronan ta invertí den futuro di Kòrsou. Ta tempu pa trata maestronan ku e rèspèt i brinda nan e sosten ku nan meresé pa asina nan por inspirá i eduká e futuro generashonnan efektivamente.