Reakshon riba publikashon den matutino tokante di detenshon robes

 

KUERPO POLISIAL KÒRSOU

KOMUNIKADO DI PRENSA

9 febrüari 2025

Reakshon riba publikashon den matutino tokante di detenshon robes

051/2025

Ounke ku un poko retraso, Kuerpo Polisial Kòrsou ta haña ku tòg ta nesesario, pa duna su
reakshon riba un kaso ku a sali publiká den un matutino djabièrnè dia 7 di febrüari 2025
bou di e título: “Polis a detené hòmber robes, maltrat’é i lag’é pasa angua.’
Ta bon si pa enfatisá, ku e matutino, na momentu ku el a risibí e informashon aki,
korektamente a tuma kontakto ku Kuerpo Polisial pa tende e vershon di su banda, pero na e
momentu ei esun responsabel pa komunikashon ku prensa, no tabata disponé di e
informashon korespondiente.
E kaso aki a hala bastante atenshon i sòru pa sufisiente reakshon riba medionan sosial pero
tambe den korantnan hulandes.
Sin ke bai hopi den detaye di e kaso, ya ku esaki ta den investigashon, ta importante si pa
trese dilanti ku polis a hañ’é obligá durante di intervenshon den e kaso aki, na tuma akshon
pa ku e persona enkestion, ya ku el a kometé entre otro destrukshon, maltrato i intento di
ladronisia di vehíkulo.
Su komportashon tabata agresivo di tal ekstremo i kompletamente fuera di kontrò, siendo
un menasa direkto pa òrdu públiko i seguridat, ku tabata motibu pa el a keda someté na un
kontròl médiko, promé ku por a kontinuá e proseso polisial kuné.
Por lo tanto polis ta mantené su mes na kontenido di e komunikado aki i lo duna espasio na
un eventual investigashon ku mester revelá tur e detayenan di e kaso.