Plan di Digitalisashon di dokumentonan pa vehíkulo ku avanse positivo

Plan di Digitalisashon di dokumentonan pa vehíkulo ku avanse positivo

 

 

Minister Hato a risibí presentashon di CORE NV su Datacenter

 

Willemstad   – Durante un enkuentro na CORE NV, Minister di Maneho di Gobernashon, Planifikashon i Servisio Públiko, mr. Shalten Hato a kontinuá ku deliberashon pa e plan di digitalisashon pa dokumentonan di vehíkulonan den tráfiko. Den kuadro di esaki, e Minister huntu ku su komitiva a hasi un bishita na CORE NV su datacenter pa studia e posibilidatnan ku esaki lo brinda.

 

E plan digital mobil ta pa fasilitá e trabounan di kontrol polisial  den tráfiko i tambe di investigashonnan ku tin ku keda hasi di parti kuerpo polisial. Durante e bishita a haña informashonnan mas detayá di e posibilidatnan ku CORE ta ofresé den programashon di informashon i ku lo bai pone esakinan disponibel na tur unidatnan di kuerpo polisial Kòrsou sea riba desktop òf plataforma mobil. Tambe CORE a duna informashonnan di servisionan di un datacenter.  Minister Hato mas aleu a risibí informashon relashoná ku e prosedura i tambe e ekspertisio nesesario ku mester pa e plan di digitalisashon por inisiá a korto plaso. Durante di e presentashon na Minister, e tim di CORE a elaborá kon pa salbaguardiá informashonnan importante di hustisia pa nan por ta “seif” i protehá kontra krímen sibernetiko. Denter di korto lo sinta na mesa ku profeshonalnan pa por trese e teknologianan digital na usuarionan den hustisia. Minister Shalten Hato a enfatisá ku E lo keda kere den inovashon, modernisashon i seguridat den nos pais riba tur tereno.