MAN PIN a organisá eksitoso dia di informashon i partisipashon pa grandinan.

MAN PIN a organisá eksitoso dia di informashon i partisipashon pa grandinan.

 

Willemstad: MAN-PIN den fin di siman tras di lomba a organisá un enkuentro ku mas ku 200 adulto mayó na Hòfi Fidel. Esaki tabata pa prinsipalmente skucha e adulto mayó durante e bunita enkuentro aki. Durante di e mainta aki e mayornan di edat por a disfrutá di músika di Dj Stephen Quan, Típiko  Pasa Bon i di e Rei di Tumba di nos adultonan mayó, Farley Lourens.

 

MAN-PIN den su programa di vishon i maneho presentá, ta enfatisá bienestar di grandinan di manera konkreto i duradero. For di Suzy Römer, Erwin Raphaela i  Gaby Da Costa Gomez te ku Jovi Alvares , Herbert Römer, Jeanouelle van Leeuwen i Kenneth Gijsbertha, adultonan mayó ta bon representá riba e lista di kandidato di MAN-PIN pa elekshon dia 21 mart awor. Tur ta personanan ku di un òf otro manera, komo adulto mayó, ta hopi aktivo den komunidat i ta aportá den áreanan di formashon i edukashon, periodismo sosial, prosesonan di kambio, músika i deporte.

 

Dr. Rob de Lannoy tabata entre esnan ku a sòru pa informashon balioso den su charla interesante riba enbehesimentu pa asina konsientisá nos grandinan. Despues di esaki a hasi un ehersisio kaminda kada mesa por traha un lista di rekomendashonnan kon adultonan mayó ta deseá di mira bienestar di nan mes i pa henter Kòrsou. Tabata un momento úniko i bunita pa mira e interkambio entre esnan presente riba nan preokupashonnan i nan pensamentunan ku nos kandidatonan riba lista pa un mihó pais pa nos tur. Despues di e interkambio kada grupo/mesa a trese nan deseo- i preokupashonnan dilanti.

 

Puntonan ku a resaltá ta transporte públiko pa mobilidat di grandinan , preis di transporte , infrastruktura den barionan, molèster di kachónan den bario, malkontentu ku HAP, lista di espera di CMC, kosto di bida haltu i naturalmente e penshun di behes (AOV) ku no ta yega pa por hiba un bida digno. Pa MAN-PIN e tipo di partisipashonnan aktivo aki ta kore manera un liña kòrá den nos vishon i e enkuentro ta muestra ku e partisipashon aktivo aki ta posibel dor di inkluí otronan. Introdukshon di Konsehonan di Bario ta un forma aktivo pa envolví siudadanonan di tur edat den toma di desishon pa gobernashon di nos pais.

 

Lider polítiko di MAN –PIN Giselle Mc William ta mira bèk ku hopi satisfakshon riba e mainta bunita aki kaminda por a disfrutá huntu ku nos grandinan ku alegria, informashon i partisipashon real.

 

Giselle Mc William