Prome Minister Evelyn Wever-Croes: UN TOTAL DI 9 PERSONA A CELEBRA NAN HUBILEO NA EPI DIABIERNA ULTIMO
Prome Minister Evelyn Wever-Croes:
UN TOTAL DI 9 PERSONA A CELEBRA NAN HUBILEO NA EPI DIABIERNA ULTIMO
“E trabou di esnan den e veld di enseñansa no ta solamente importante sino tambe hopi grandi y bunita, y nan merece tur clase di respet”
ORANJESTAD – Diabierna atardi Prome Minister Evelyn Wever-Croes tabata presente na EPI pa celebracion di hubileo di 9 docente di EPI. Prome Minister a indica cu e momento aki tabata uno hopi special mirando cu e docentenan aki ta celebra entre 25 pa 45 aña den e veld di enseñansa na EPI, cu hunto ta conta cu un total di 280 aña di experiencia.
Durante su discurso Prome Minister a tuma e oportunidad di gradici cada un di e docentenan aki pa tur e añanan di dedicacion na nos hobennan. E docentenan aki no solamente ta un guia pa nos hobennan sino tambe un “role model”, cu a sa di tin un influencia positivo riba e exito di cada un di nan. Danki na nan dedicacion y esfuerso awe e hobennan aki ta exitoso. Docentenan no solamente ta guia e hobennan sino tambe ta un ayudo grandi pa e mayornan pa loke ta guia profesional di nan yiunan.
Prome Minister ta felicita cada un di e docentenan aki pa tur e añanan di amor y dedicacion na nos yiunan, y ta gradici e famianan di e docentenan pa nan sosten durante tur e añanan aki. Un pabien tambe na EPI pa tur e sosten cu nan ta duna comunidad den e area di enseñansa.
Por ultimo Prome Minister a referi na e discurso di docente Harrisch Chin Sie Jen, cu ta mustra con chikito Aruba ta. Señor Chin Sie Jen tabata docente tempo cu Prome Minister su casa y su yiu tabata bay scol, y tabata colega di su mama. Pues aki ta papia di tres generacion, y tur e añanan aki ta muestra di cuanto experiencia señor Chin Sie Jen tin den e ramo aki. E trabou di esnan den e veld di enseñansa no ta solamente importante sino tambe hopi grandi y bunita, y nan merece tur clase di respet.
