BISHITA DI SEÑOR OLIVIO DE CUBA CERCA PROME MINISTER
Prome Minister Evelyn Wever-Croes:
BISHITA DI SEÑOR OLIVIO DE CUBA CERCA PROME MINISTER
Diaranson ultimo, Prome Minister Evelyn Wever-Croes cu gran honor a ricibi señor Olivio de Cuba na su oficina na Bestuurskantoor. Señor Olivio de Cuba a traha hopi aña como fotografo na BUVO. Un trahado semper ehemplar y responsabel pa cu su trabou kende sigur a imprimi y reforsa hopi historia den cada fotografia cu el a tuma.
Señor de Cuba a traha tambe hopi tempo cu señor Gilberto Françios ‘Betico’ Croes y a sigui Betico Croes cu su camara tur caminda. Cu hopi placer y emocion, Prome Minister a scucha algun anecdota cu señor de Cuba a conta di e tempo ey. Awor señor de Cuba ta gozando pa 25 aña caba di su pensioen bon mereci y su bishita na Bestuurskantoor tawata un deseo di señor de Cuba cu awor a wordo cumpli.
Prome Minister ta gradici señor de Cuba pa su bishita masha grato mes y alabes ta felicita señor de Cuba cu su 85 aña cu el a cumpli diasabra ultimo.
