Proposishon di Lei pa oumentá kastigu pa atrako riba turista  

 

Proposishon di Lei pa oumentá kastigu pa atrako riba turista  

WILLEMSTAD, – Otro proposishon ku Minister di Hustisia, mr. Shalten Hato a manda pa tratamentu den Parlamento ta un proposishon di lei pa Parlamento oumentá e kastigu di prisòn pa atrako riba turistanan ku ta bishita nos isla. E proposishon aki ta pa oumentá e kastigu di prisòn di 4 a 6 aña.

Segun Minister Hato, e medida aki ta nesesario pa protehá e sektor turístiko, ku ta un di e pilar mas importante di nos ekonomia. Turismo ta kontribuí di forma signifikativo na desaroyo i prosperidat di Kòrsou, i e ta importante pa keda duna e bishitante un grado di seguridat i bienestar. Pa esei, Gabinete Pisas II ta determiná pa tuma medidanan firme kontra aktividat kriminal ku ta dirigí kontra turista.

E proposishon di lei ta sigui tambe e modelo di paisnan bisiña manera Aruba i Sint Maarten, kaminda turistanan ta disfrutá di mas protekshon legal. Introdukshon di kastigu mas severo pa delitonan dirigí kontra turista lo sirbi komo un medida preventivo, i tambe lo manda un mensahe kla ku Kòrsou no ta tolerá akto di kriminalidat kontra bishitante.

Minister Hato a indiká ku e proposishon di lei ta parti di un strategia mas amplio pa kombatí kriminalidat i promové seguridat den komunidat. E minister a enfatisá ku, ademas di protehé turista, e medida aki lo benefisiá riba bienestar general di nos pueblo.

E proposishon di lei entretantu a bai pa Parlamento. Minister Hato ta spera ku e proposishon lo haña sosten amplio, pa asina por duna Kòrsou un mekanismo legal mas fuerte pa luchá kontra kriminalidat i garantisá un destinashon turístiko mas sigur i atraktivo.

Gobièrnu ta enfatisá  serka tur sektor den komunidat pa kolaborá pa mantené un ambiente sigur, seif i amistoso pa bishitante i residente meskos. Kòrsou ta konosí pa su kalidat i hospitalidat, i e ta importante pa keda stimulá e imágen positivo aki. Ku esaki, Minister Hato ta spera ku antisosialnan lo pensa promé ku kometé un atrako riba turista, enbista ku e kastigu ta oumentá i ta stroba bo libertat.