Prome Minister Evelyn Wever-Croes: PROME MINISTER TAWATA ORADOR INVITA NA E ‘INTERNATIONAL SOCIETY OF BARRISTERS’ (ISOB)

 

Prome Minister Evelyn Wever-Croes:

PROME MINISTER TAWATA ORADOR INVITA NA E ‘INTERNATIONAL SOCIETY OF BARRISTERS’ (ISOB)

“Tawata un honor grandi di por a representa Aruba na e ocasion aki”

 

ORANJESTAD – Dialuna mainta 3 di maart a tuma luga na Ritz-Carlton e apertura di e conferencia di Internacional Society of Barristers (ISOB). Den cuadro di esaki Prome Minister Evelyn Wever-Croes a wordo invita pa duna e “Keynote opening speech”.

 

ISOB tin mas di 200 miembro di varios pais, desde Merca te New Zeeland. Ta trata di personanan cu ta traha den area legal y ta na Aruba pa diferente reunion y pa celebra 60 aña di nan asocacion.

 

Den su discurso, Prome Minister a elabora extensamente riba varios tema entre otro, turismo, economia, retonan den nos region y riba e sistema legal di Aruba cu ta uno stabiel y ta duna garantia mirando cu Aruba ta parti di Reino y esaki ta ofrece oportunidad grandi pa inversion.

 

“Mi ta gradici ISOB pa scoge nos dushi isla Aruba pa bin celebra nan 60 aniversario y mi ta spera cu e bunitesa, e calor y e hospitalidad di Aruba laga nan yena cu bunita recuerdo. Durante mi discurso, mi a elabora riba e diferente aspectonan di interes bou e miembronan y nan a keda satisfecho y gradecido cu tur e informacion y a bin cu varios pregunta. Cu e conferencia aki, nos a trece Aruba na un nivel mas halto y pa mi naturalmente tawata un honor grandi di por a representa Aruba na e ocasion aki“, Prome Minister a expresa.