KAMPAÑA POLÍTIKO PA UN PUEBLO KRISTIAN DEN KUARESMA

KAMPAÑA POLÍTIKO PA UN PUEBLO KRISTIAN DEN KUARESMA

 

Willemstad – Den konteksto di un kampaña polítiko,  djarason di shinishi,  mester sirbi komo un momentu pa reflekshon i unifikashon. E simbolismo di shinishi—ku ta representá humildat, mortalidat i renovashon spiritual—ta enfatisá e importansia di liderato ku ta sirbi ku integridat i un visión kla pa komunidat.

 

Un partido i kandidato polítiko por uza e mensahe di arepentimentu i renovashon pa inspirá nos pueblo pa buska un futuro di speransa i progreso.

 

Nos pais ta pasando den situashonnan difisíl; kosto di bida haltu, komestibel kasi inpagabel, un ekonomia desbalansá, kresiendo den turismo so i sin ku e pueblo ta benifisiá sufisiente, barionan deskuidá, 10.000 desgrasia pa aña den tráfiko, violensia doméstiko i bou muchanan di skol, falta di perspektiva pa nos hobennan, etc. Esakinan ta djis algun ehèmpel.

 

E inisio di kuaresma ta e momentu pa enfatisá e nesesidat pa partidonan polítiko presentá programanan di vishon i akshon kla pa desaroyo di Kòrsou. E akshonnan mester ta konkreto i transparente pa grantisá bon gobernashon i un kompromiso pa sirbi e interesnan di pueblo riba manera étiko.

Ta e momentu pa polítikonan komprometé nan mes pa hiba e sobrá di kampaña riba issues i no ku falsu testimonio riba hende.

 

Koleganan polítiko, laga nos tur splika pueblo na drechi i desente kon di un forma duradero nos huntu ta solushoná e pobresa kresiente. No laga ku e pregunta: ‘ekonomia pa ken?’ ta sigui resoná. Kontestá e pregunta kon e ekonomia ta bira un ekonomia pa tur i benifiso pa tur.

E pueblo aki no mester di mas violensia verbal, bullying, gañamentu, malinformashon of promesanan bashi.

 

Ban debati ku kontenido riba futuro di nos pais.

Giselle Mc. William