MAN-PIN KU MANEHO EFEKTIVO PA GARANTISA BIENESTAR SOSIAL

MAN-PIN KU MANEHO EFEKTIVO PA GARANTISA BIENESTAR SOSIAL

Willemstad, Kòrsou –E éksito di un sosiedat ta konektá na e bienestar di tur su siudadanonan. Aktualmente tin mas o menos 45.000 hende ta biba bou di e liña di pobresa. Pobresa na Kòrsou ta un problema agudo ku mester wòrdu atendé ku urgensia. Esaki ta nifiká ku un parti grandi di nos komunidat tur dia ta lucha pa kumpli ku nan nesesidatnan básiko. Esaki no solamente ta un problema sosial, sino tambe un problema ekonómiko i moral ku ta pidi pa solushonnan struktural.

Pobresa ta afektá spesialmente personanan di edat avansá i mamanan soltero ku no tin sufisiente entrada pa biba un bida digno. Nos nèt di  siguridat sosial no ta efektivo; e benefisionan manera AOV i asistensia sosial ta bou di e mínimo di eksistensia i pa años kaba esaki no a wòrdu adaptá strukturalmente. Esaki ta hasi’é kasi imposibel pa míles di kas aki na Kòrsou por kubri nan gastunan mensual.

Pobresa ta un problema kompleho, pasó hopi bia e ta kana man den man ku otro problemanan sosial manera desempleo, analfabetismo, problemanan di bibienda, asuntunan di salú i un falta di akseso na edukashon di kalidat. Hopi famia na Kòrsou tin problemanan multiple i no solamente tin di haber ku insiguridat finansiero, sino tambe ku un falta di yudansa sosial i perspektiva pa futuro. Ounke ku e problema aki a keda señalá pa años kaba, nos no ta mira akshon konkreto di e gobièrnu aktual pa introdusí kambionan struktural ku ta kombatí pobresa di un manera duradero.

MAN-PIN ta proponé medidanan konkreto. Nos ke fortalesé siguridat sosial dor di mehorá e sistema di penshun i asistensia sosial pa sigurá un bida digno. Nos ta defendé e re-introdukshon di trahadonan sosial den barionan, pa identifiká i yuda famianan den nesesidat. Bibienda pagabel i kuido mediko ta esensial, p’esei nos ta insistí riba un plan konkretu pa mas kas i un kuido mehor pa esnan mas vulnerabel. Pa enfrentá pobresa na su raís, nos ta promové un salario minimo adaptá na e kosto di bida real, mas oportunidat di trabou i programanan di formashon profeshonal.

A yega ora pa akshon! A yega ora pa atendé ku e problematika aki na un manera duradero i efektivo.

Vianella Gijsbertha-Leer