Minister Maduro di Finansa ta informa: E cifranan di e ultimo kwartaal di aña 2024 ta publica riba www.gobierno.aw y ta mustra cu Aruba ta cumpli cu e normanan financiero pa mehora finansa publico

Minister Maduro di Finansa ta informa:

E cifranan di e ultimo kwartaal di aña 2024 ta publica riba http://www.gobierno.aw y ta mustra cu Aruba ta cumpli cu e normanan financiero pa mehora finansa publico

E resultado financiero ta un surplus colectivo di 7.6%, desaroyo di gasto di personal na 6,8% di GDP y un debe reduci na 74,4% di GDP

 

Na fin di cada kwartaal Minister di Finansa ta duna Parlamento, Conseho di Minister y CAFT un bista riba e cifranan di e realisacion di e presupuesto di Pais Aruba. Recientemente e cifranan di e ultimo kwartaal di aña 2024 a keda publica riba http://www.gobierno.aw den cual por mira, entre otro, un resultado financiero di un surplus colectivo di 7.6%, un desaroyo di gasto di personal na 6,8% di GDP y un debe reduci na 74% di GDP. Un resultado cu ta cumpli cu e normanan financiero pa mehora finansa publico manera ankra den e Ley di supervision financiero LAFT, di un surplus colectivo di minimo 1% di GDP, un desaroyo di gasto di personal bou 10% di GDP y un debe reduci na caminda pa 50% na aña 2040.

 

Surplus colectivo di minimo 1% di GDP

Den e Uitvoeringsrapportage di e cuater kwartaal di aña 2024 (URK 4-2024) por lesa cu e resultado financiero na nivel di Gobierno ta un surplus di 4,3% di GDP y na nivel colectivo ta un surplus di 7,6%. E ultimo aki ta hopi mas halto cu e 1% di GDP cual ta e norma financiero ankra den e Ley di LAFT. E 7,6% di GDP ta ekivalente na 542 miyon florin.

 

Desaroyo di gasto di personal bou 10% di GDP

Pa locual ta gasto di personal den aña 2024 por mira cu esaki ta na 6,8% di GDP cual ta bou di e norma pa gasto di personal bou 10% di GDP. E 6,8% di GDP ta ekivalente na 469 miyon florin.

 

Debe reduci na caminda pa 50% na aña 2040

Den aña 2024 Gobierno a paga 630 miyon florin na debe y na fin di aña e debe a yega na 74% di GDP, locual ta riba e caminda pa cumpli cu e norma financiero di un debe di Aruba na 50% di GDP na aña 2040. E 74% di GDP ta ekivalente na 5198 miyon florin.

 

URK ta un documento publico

E cifranan di cada kwartaal den e URK ta publico y por wordo mira riba e website http://www.gobierno.aw via e link https://cuatro.sim-cdn.nl/arubaoverheid2858bd/uploads/URK4-2024%2028%20februari%202025.pdf?cb=MgPoVKCb