KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

WoMen Steering Committee Curaçao preparando pa selebrá Dia di Hende Muhé

 

WoMen Steering Committee Curaçao preparando pa selebrá Dia di Hende Muhé

 

Uniendo na yamada di Nashonnan Uní pa aselerá akshon

 

WILLEMSTAD – Dia 8 di Mart gran parti di mundu ta selebrá Dia Internashonal di Hende Muhé. Nashonnan Uní a skohe komo tema pa e aña aki; Aselerá Akshon. Riba e ‘dia’ ta para ketu riba kontribushon di hende muhé den vários área, lanta konsientisashon pa igualdat di género i promové empoderashon. “Tur e puntonan aki ta haltu den bandera, agènda i akshonnan di WoMen Steering Committee Curaçao,” sra. Mirieta Lourens – de Lanoy, a bisa. “Riba e dia ta tira un lus spesial riba logronan insentivá pa e hende muhé, den área sosial, ekonómiko, i polítika. Miéntras ta enfoká riba derechi di hende muhé, loke ku WSCC a bin ta hasi pa 50 aña,” e presidente di WSCC a sigui bisa.

 

“Banda di aktividatnan di selebrashon riba e dia, ta informá di logronan, pero alabes ta pone atenshon na e echo ku tin un kaminda pa kana ainda den e lucha kontra violensia basá riba género, desigualdat riba diferente tereno i representashon hopi abou den polítika. No opstante progreso den vários área, ainda tin hopi barera ku ta stroba progreso i bienestar di e hende muhé. Mester aselerá mas akshon, manera Nashonnan Uní a proklamá pa medio di e lema pa 2025, sra. Lourens – de Lanoy a enfatisá. “Alabes mester empoderá mas solidaridat entre hende muhé i enkurashá diskushonnan sanu pa realisá e metanan menshoná. Tantu serka organisashonnan, den seno di gobièrnu, i entre gobernantenan i organisashonnan manera, entre otro, WoMen Steering Committee Curaçao.”

 

Aselerá akshon ta un yamada mundial pa krea mas rekurso, i empoderá strategia pa realisá implementashon di e akshonnan ku mester kondusí na progreso di e hende muhé. Mester realisá mas inklushon den diferente área i kibra barera ku ta stroba desaroyo di e ser humano.”

Pa loke ta aktividatnan ku WoMen Steering Committee Curaçao tin planiá pa miembronan di klupnan afiliá na WSCC, i hende muhé en general, ta un Santu Sakrifisio ku lo tuma lugá 9or na misa Maria Auxiliadora na Santa Maria dia 8 di mart 2025. Anochi selebrashon ku un enkuentro sosial ku miembronan, durante kua lo tin diferente orador di órden i rekonosementu na vários dama di diferente grupo kende nan nominá pa e trabou digno di atenshon ku nan a bin ta hasi atraves di hopi aña na bienestar di nan organisashon i komunidat di Kòrsou en general. Durante di e anochi aki lo presentá e nominadonan i un komishon lo saka e ganadó di WoMen Steering Award ku ta un rekonosementu ku nos ta otorgá na e muhé/hòmbernan ku ta ekselentá den e trabounan ku nan ta hasi.

 

“Nos ta ekstendé un invitashon na tur hende muhé, i miembronan di nan famia, pa kompañá nos durante di e Santu Sakrifisio di Misa. Pa e enkuentro sosial a bai invitashon via di direktiva di klupnan afiliá. For di awor nos felisitashon na tur hende muhé relashoná ku Dia Internashonal di Hende Muhé 2025,” sra. Mirieta Lourens – de Lanoy a terminá bisando.

639114718427035"
639114718427035"