Den kuadro di proyekto di resosialisashon Detenidonan di SDKK ta subi fli ku Fr. Evoniusschool

Den kuadro di proyekto di resosialisashon

Detenidonan di SDKK ta subi fli ku Fr. Evoniusschool

SDKK ta duna bèk na komunidat atrabes di 350 fli

WILLEMSTAD – Detenidonan di Sentro di Detenshon i Korekshon Kòrsou (SDKK), ku ta forma parti di e “buitenproject” huntu ku e personal di prizòn a organisá un tremendo aktividat di subimentu di fli pa alumnonan di  Frater Evoniusschool.

Resientemente banda di e aktividat ariba menshoná, SDKK a hasi entrega  mas di 350 fli na 6 diferente organisashon di mucha aki na Kòrsou. Tur esaki ta forma parti di e plan di prevenshon i resosialisashon di nos klientenan. Den un ambiente ameno e alumnonan di Frater Evoniusschool a subi fli huntu ku nan dosentenan, personal di prizòn, Minister di Hustisia i tambe algun klientenan di SDKK.

Na okashon aki tabata tei presente i hiba palabra  Minister di Hustisia mr. Shalten Hato, representante di kabinèt di Minister di OWCS señor Errol Bishop, dosente di Frater Evoniusschool, Bosero di SDKK sr. Jabets Pinedo i tambe un kliente di SDKK ku a hiba un palabra di motivashon na tur presente.

Gerensia di SDKK, kier a gradisí tur persona i instansia ku a koperá pa asina e aktividat di subimentu fli ku Frater Evoniusschool tabata un éksito total.