Kòrsou a perde un tremendo músiko: DJARASON TA TUMA DESPEDIDA DI FELIX SUSANA

Kòrsou a perde un tremendo músiko:

DJARASON TA TUMA DESPEDIDA DI FELIX SUSANA

 

WILLEMSTAD — Direktiva di AMAK a tuma nota di fayesimentu di Felix Sunana, musiko oriundo di Westpunt. Felix tabata un konosido tresísta ku a yega di aktua den diferente banda aki na Korsou manera: Felix i su Combo,  Supersonico, Manichi i su Estrella, Grupo Nos, La Clave, San Jose, Arnell i su Orkesta, Cuban Express, Son CC, Karimbo,  Soneros Son i tambe Grupo Baranka.

Feli (manera su amigunan tabata yamé)  tabata konosí komo un músiko trankil ku tabata tin un tremendo oído ku ta pone ku e por a yega i djòin kualkier agrupashon  musikal ku ta toka den género latino, den un forma profeshonal.

Direktiva di AMAK ta konsiente ku na Kòrsou aktualmente tin diferente instrumèntnan manera Mandolin i  Tres,  ta instrumentonan ku  hóbennan ku ta lantando no ta mustra interes pa nan i konsekuentemente nos ta kore e rísiko ku den futúro nos no tin e músikonan ku ta dominá e instrumentonan aki riba nos Isla mas.

Feli sigur lo bai hasi falta den e género di musika latino ku e tabata milita aden i sigur su sólonan riba Tres.

Direktiva di AMAK ta deseá forsa na tur músikonan, na su famianan en general i mundu farandulero den su totalidat, hopi forsa den e momentunan aki.

Su entiero lo ta mayan djarason  dia 1 di aprel 2025 na El Tributo di 1 or pa 4 or. Un apelashon ta bai na Músikonan di Kòrsou akompañá Felix Susana na su ultimo luga di sosiegu.

E deséo di AMAK ta pa mas hóben siña toka instrumentonan manera madolin i Tres.

Ku su alma sosega na pas.

 

Direktiva di AMAK