Minister Shalten Hato (BPD) ta bishita “verkeerstuin” na Plaswijckpark

Importansia di un tráfiko sigur ta inisiá for di nos muchanan.

 

Minister Shalten Hato (BPD) ta bishita “verkeerstuin” na Plaswijckpark

 

WILLEMSTAD.- Minister dimenshonario Shalten Hato di Maneho di Gobernashon, Planifikashon i Servisio Públiko (BPD) ta sigui ku su bishitanan di kalidat importante na Hulanda. E biaha aki e bishita tabata entre otro na “verkeerstuin” na Plaswijckpark.

 

Resientemente tabata den media, ku minister Hato a re inougurá parke di tráfiko (verkeerspark) na Damacor, kaminda el a sòru pa un renobashon kompletu di e parke despues di kasi 39 aña. Den e kaso aki minister Hato i Gabinete Pisas II a pone fondonan disponibel pa por hasi diferente mantenshon atrasá ku tabata nesesario na nos Parke di Tráfiko. Esaki después ku diferente stakeholders (no gubernamental) tabata kontribuí.

 

Minister Hato a bisa di ta konvensí ku konosementu, tene kuenta ku regla di tráfiko i e importansia di un tráfiko sigur ta inisiá for di nos muchanan. Pa e motibu ei,minister ta konvensí ku ta  importante pa sigui invertí kontinuamente den nos Parke di Tráfiko i pa e Parke sigui desaroyá ku nos tempu aktual. P’esei esaki tabata motibu ku minister a  bishitá e “verkeerstuin” na Plaswijckpark, kaminda minister a risibí un rekorido den e Parke i e verkeerstuin, guiá pa e presidente di e Konseho di Supervishon i tambe e direktor di e Parke. Durante e rekorido minister a papia tokante aliansa stratégiko i posibel futuro kolaborashon entre e verkeerstuin i nos Parke di Tráfiko.