PROMÉ MINISTER SR. GILMAR PISAS A REUNÍ KU REPRESENTANTENAN DI FIFA, CONCACAF i FFK

PROMÉ MINISTER SR. GILMAR PISAS A REUNÍ KU REPRESENTANTENAN DI FIFA, CONCACAF i FFK

 

Willemstad – Promé Minister sr. Gilmar Pisas a reuní ku representantenan di FIFA, CONCACAF i Federashon Futbòl Kòrsou (FFK) dia 10 di aprel 2025.

 

E reunion tabata pa informá Promé Minister sr. Pisas riba e situashon aktual di futbòl, e transishon den liderasko di Federashon Futbòl Kòrsou, e desaroyo kontinuo di e deporte i e proseso di elekshon di direktiva nobo di FFK ku a tuma lugá dia 10 di aprel 2025.

 

A pone énfasis riba e kompromiso ku Gabinete Pisas II i próximo Gabinete Pisas III tin pa sigui fortalesé i sostené nos futbòl nashonal i deporte en general.

E sostén aki a ser demostrá konkretamente durante di e último añanan kaminda varios stadion a keda mehorá ku kolokashon di tapèit di yerba sintétiko nobo, sistema di iluminashon i tambe konstrukshon di un stadion nobo na Soto.

 

E vishon di e próximo gobièrnu, Gabinete Pisas III, ta pa sigui invertí den e deporte di futbòl i su infrastruktura ku ta forma un base esensial pa nos hóbennan por hinka nan energía den algu positivo i mantené asina nos hubentut for di e gara di kriminalidat.

 

Representantenan di FIFA i CONCACAF tambe a ekspresá nan apresio pa e esfuerso kontinuo di parti di Gobièrnu di Kòrsou. Na mes momentu nan a reafirmá nan disposishon tambe pa sigui traha huntu ku FFK den e desaroyo struktural di futbòl na Kòrsou, pa asina Kòrsou finalmente por yega na su propio identidat futbolístikó.

 

E reunion a tuma lugá den un ambiente di kolaborashon kaminda a dialogá habrí, pa fortalesé e fundeshi di un relashon aún mas fuerte entre e partidonan lokal i internashonal, na interés di futbòl di Kòrsou.