Yu ta kai den pisina

KOMUNIKADO DI PRENSA 183/2025
11 mei 2025
Yu ta kai den pisina
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ
Djasabra 10 di mei 2025 alrededor di 17.23’or, Sentral di Polis a dirigí tantu polis komo
ambulans ku urgensia pa un kas den Emmalaan, pa un yu ku a kai den pisina.
Na yegada di polis, nan a topa un dama ku un beibi den su brasa.
E dama a deklará na polis ku e tabata okupando su mes den kas ku algun aktividat i a nota ku su yu di 18 luna no tabata paden.
Na momentu ku el a wak pafo, ela tuma nota ku e beibi tabata den e pisina den kurá di e
kas.
Mesora el a saka su yu for di awa i kuminsá ku reanimashon.
Seguidamente el a hiba e yu na un bisiña ku ta dòkter, ku a kontinuá ku e intervenshon
médiko, sperando ambulans pa transport’é pa Sala di Emergensia di C.M.C.
Polis a konstatá ku rondó di e pisina tin un separashon di metal i un porta ku tabata na lòk.
Sinembargo, ku tur probabilidat e yu a mira oportunidat di pasa bou di e separashon i kai den e pisina.
