𝐅𝐮𝐧𝐝𝐚𝐬𝐡𝐨𝐧 𝐊𝐮𝐢𝐝𝐨 𝐝𝐢 𝐀𝐦𝐛𝐮𝐥𝐚𝐧𝐬 𝐀 𝐊𝐮𝐦𝐩𝐫𝐚 𝐃𝐨𝐬 𝐀𝐦𝐛𝐮𝐥𝐚𝐧𝐬 𝐍𝐚 𝐂𝐡𝐢𝐧𝐚.

Fundashon Kuido di Ambulans Kòrsou (FKAK) resientemente a kumpra dos ambulans nobo for di China. FKAK a kumpra 1 ambulans marka FORD i 1 ambulans marka IVECO.

FKAK aktualmente tin 9 vehíkulo di ambulans, di kua 1 a keda konstruí na aña 2010, 2 ta di aña 2014, 3 ta di aña 2017 i 3 ta di aña 2024.

Debí na e volúmen haltu koré, debí na e flota chikitu i nan edat, e ambulansnan ta birando ménos i ménos usabel apesar di bon mantenshon preventivo.

Algun ta daña kada bes i mester sali for di servisio pa periodonan kòrtiku òf mas largu.

FKAK a disidí pa oumentá e flota di ambulans. Na aña 2023, un total di 3 ambulans a wòrdu kumprá for di Merka i awor ta oumentá e flota ku 2 ambulans nobo for di China.

Na Merka, e demanda pa ambulans mas smal no por wòrdu kumplí debí na e atraso den produkshon di ambulans ku a tuma lugá durante e periodo di COVID 19. Preisnan tambe ta muchu mas haltu na Merka.

E 2 ambulansnan nobo ta un adishon na e flota aktual debí na e echo ku por lo ménos un ambulans marka IVECO ta kumpli ku e rekisitonan ku por kore off-road i riba kamindanan difísil pa yega (4x4D).

E ambulans aki por kore dor di kayanan smal te na e sitio di e insidente; tambe e ambulans por pasa dor di kayanan kaminda awa por subi te na 75 cm.

E otro ambulans marka FORD, banda ku e por kore den kayanan smal por wòrdu usá tambe komo ambulans dediká pa tratamentu di pashèntnan ku malesa infeksioso.

FKAK ta premirá ku e ambulansnan aki lo ta operashonal dentro di dos siman.