Mihó kalidat di dato, pa mihó desishon Simposio di CBCS riba Statistik i Investigashon na Sint Maarten
Mihó kalidat di dato, pa mihó desishon
Simposio di CBCS riba Statistik i Investigashon na Sint Maarten
WILLEMSTAD/PHILIPSBURG – Dia 21 di mei, Centrale Bank van Curaçao en Sint Maarten
(CBCS) a tene su di dos simposio di e aña akí, ku enfoke spesífiko riba Sint Maarten. E simposio
Better Data, Better Decisions a enfatisá e ròl i importansia di dato, prinsipalmente statistik di
balansa di pago, ku CBCS ta usa pa investigashon, análisis ekonómiko i maneho den e union
monetario. CBCS ke usa su investigashonnan pa fomentá diálogo i kolaborashon ku komunidat
akadémiko, su institutonan homólogo den region i demas stakeholder krusial.
Hopi bes, debí na falta di rekurso, kapasidat limitá i vulnerabilidat pa shòk eksterno, pais chikitu tin
difikultat pa reuní dato statístiko eksakto i konfiabel. Sint Maarten no ta un eksepshon, i e pais akí
su frontera habrí ku Saint Martin ta kompliká e tarea di krea un sistema di statistik robusto i
kompleto asta mas.
P’esei, e simposio tabatin tres meta. Di promé, kontribuí na konsientisashon riba e importansia di
dato i statistik pa e trabou i e tareanan fundamental di CBCS. Di dos, presentá e resultadonan di su
investigashonnan empíriko na Sint Maarten, entre otro, kon e pais ta prestando riba tereno di
invershon direkto for di eksterior i integrashon regional. I di tres, entablá un diálogo ku públiko, ku
lo yuda CBCS hisa kalidat i relevansia di tantu su datonan statístiko komo su investigashonnan.
E programa a inkluí presentashon i diskushon di panel, ku representante di gobièrnu, komunidat
empresarial i demas stakeholder ku tin un interes den mehorá e panorama di dato di e pais.
Den kuadro di e metanan di integrashon regional i mihó statistik, un aspekto destaká di e evento
akí ta ku por a konta ku presensia di algun representante di Eastern Caribbean Central Bank (ECCB),
inkluso nan direktor-presidente,, i direktor regional di Institut d’Émission des Départements
d’Outre-Mer (IEDOM), kompartiendo eksperensia i partisipando aktivamente den e diálogo. IEDOM
ta fungi komo banko sentral di e teritorionan ultramar franses bou di ouspisio i outoridat di Banque
de France.
Esaki ta e di dos simposio di e aña akí i ta parti di un serie di simposio relashoná ku e tema di
investigashon. Na yanüari, CBCS a organisá esun promé na Kòrsou, enfoká riba e papel
fundamental di gobièrnu den ekonomia. Mas den e aña akí, na novèmber, CBCS lo organisá e
konferensia anual Monetary Studies Conference di Caribbean Economic Research Team. E evento
akí lo reuní representante di vários pais miembro di CARICOM pa interkambiá konosementu riba
tema ekonómiko di relevansia aktual.
Miéntras tantu, CBCS ta sigui traha pa fortifiká e panorama di dato na Sint Maarten, entre otro,
kolaborando ku e stakeholdernan prinsipal i mehorando e manera ku ta reuní dato statístiko
tokante balansa di pago. Fuera di esei, CBCS ta den deliberashon ku IEDOM, eksplorando
maneranan pa hasi interkambio di informashon i mehorá kon ta midi e fluhonan ekonómiko
transfronteriso i PIB.
Ademas, CBCS ta trahando riba un kolaborashon mas intensivo ku Departamento di Statistik di Sint
Maarten (STAT) i otro stakeholder, pa yega na mihó sifra tokante komèrsio i sektor real (entre otro,
tokante kuenta nashonal i inflashon), ku ta indispensabel pa por stipulá maneho pa Sint Maarten
na un manera fundamentá.
E presentashonnan hasí durante e simposio ta disponibel riba wèpsait di CBCS:
https://www.centralbank.cw/event-calendar/events/symposium-better-data-better-decisions
Willemstad, 22 di mei 2025
CENTRALE BANK VAN CURAÇAO EN SINT MAARTEN