Huramentashon di Gabinete Pisas III planiá pa djaluna 9 di yüni 2025

WILLEMSTAD – Manera ya ta konosí formador sr. Chester Peterson a entregá su relato final tokante formashon di Gabinete Pisas III na Gobernadó, Sra. Lucille George-Wout, dia 2 di yüni último.

Den su relato formador sr. Peterson a hasi rekomendashon pa nobramentu di e personanan ku a pasa screening pa e funshon di minister i tambe a entregá e Programa di Gobernashon pa e periodo 2025-2029.

Despues di deliberashon interno ku e kandidato pa Promé Minister den Gabinete Pisas III, sr. Gilmar Pisas, Sra. Gobernador Lucille George-Wout a konkluí ku a kumpli ku tur e rekesitonan pa por huramentá e gabinete nobo.

Huramentashon lo tuma lugá djaluna 9 di yüni próksimo pa 1’or di mèrdia.