Pa di 2 aña konsekutivo

Health & Wellness Fair 2025

Organisá pa Iglesia House of Worship huntu ku

Liberty University di Estados Unidos

 

Willemstad- Djasabra 21 di yüni 2025 Iglesia House of Worship huntu ku Liberty University for di Estados Unidos ta organisá pa di dos aña konsekutivo un tremendo “Health & Wellness Fair”. E feria di salú i bienestar aki ta kompletamente grátis i ta tuma lugá na Iglesia House of Worship, Erosweg 52 di 10’or di mainta pa 2’or di mèrdia. E meta di e feria aki ta pa informá, konsientisá i motivá pueblo di Kòrsou pa mantené un bon salú i un mihó kalidat di bida.

Un tim di profeshonal for di Estados Unidos lo tei presente pa asina hasi tèst di salú, duna tayer i charla riba diferente tópiko relashoná ku salú i bienestar. Algun di e tópikonan ku lo keda tratá durante e charlanan ta entre otro keintura i alergia serka mucha, problema ku nir, salú mental i emoshonal di nos grandinan i komprondé ADHD serka mucha. E charlanan lo keda tresé pa Dr. Yves Schoop, Dr. Sonia Faries, Profesor Hannah Heath i Dr. Tiffany Lamas for di Estados Unidos.

Diferente organisashon lo tin “booth” kaminda pueblo di Kòrsou por pasa i risibí informashon. Organisashonnan ku lo partisipá ta entre otro: HAP, Stichting Alzheimer, PSI Skuchami, Sentro pa Salú Públiko, Wit Gele Kruis, Eden Wellness, Alive Body Care, Mi Boka, Fundashon Prevenshon, Krus Kòrá, Fundashon Maneho di Adikshon, Fundashon Jean Carlo i Ministerio di SOAW.

Durante e feria aki tambe lo tin un seshon di “fitness” tresé pa SintiBoLiber Movement i un seshon di “dance fitness” tresé pa Dance Academy How to Dance. Pa nos muchanan lo tin un area spesial designá ku aktividatnan atraktivo pa nos muchanan den kolaborashon ku Koninklijke Nederlandse Vereniging – Blauwe Kruis (EHBO).

Pa e charlanan i e seshonnan di “fitness” tin e posibilidat pa registrá adelantá. Registrashon no ta obligatorio, pero si rekomendabel. Pa mas informashon por subi www.how-online.org/healthfair.

Un invitashon kaluroso ta bai na pueblo di Kòrsou pa bin ku famia kompleto pa asina disfrutá di nos feria di salú i bienestar dia 21 di yüni di 10’or pa 2’or di mèrdia na Iglesia House of Worship, Erosweg 52. Entrada i partisipashon ta grátis.