Biyete di NAf 100 falsu den sirkulashon Atvertensia na públiko pa no aseptá mas biyete di NAf 100

 

 

Biyete di NAf 100 falsu den sirkulashon
Atvertensia na públiko pa no aseptá mas biyete di NAf 100

WILLEMSTAD/PHILIPSBURG—Centrale Bank van Curaçao en Sint Maarten (CBCS) ta atvertí públiko tokante un oumento konsiderabel den e kantidat di biyete falsu di NAf 100 den sirkulashon na Kòrsou. Komo medida di prekoushon, CBCS ta rekomendá públiko pa, inmediatamente i te na fin di e periodo di kosirkulashon (1 di yüli 2025) no aseptá mas biyete di NAf 100 (florin di Antia Hulandes) komo pago, pa asina evitá ku e falsifikashonnan akí ta sigui plama.
Ta birando mas i mas difísil pa distinguí e falsifikashonnan for di e biyetenan genuino. Den e kaso spesífiko akí, tin persona ku ta ofresiendo biyete di NAf 100 ku nan rant a ser kòrtá. Segun e personanan akí, e biyetenan a sufri daño den un kandela. Sin embargo, ora opservá e biyetenan akí ku mas atenshon, ta sali na kla ku nan ta falsifiká.
Ta un fenómeno konosí ku, durante un transishon pa un moneda nobo, kantidat grandi di biyete falsu sa drenta den sirkulashon. CBCS a atvertí públiko tokante esaki repetidamente den e periodo ku ta tras di lomba. Falsifikadó ta usa e periodo di kosirkulashon pa deshasí di e biyetenan falsu ku nan a keda kuné den stòk. Mirando ku ta trata aki di un oumento konsiderabel, CBCS ta mira e
nesesidat di emití e aviso akí. CBCS ta rekomendá tur persona ku tin biyete di 100 florin di Antia Hulandes (NAf) den nan poseshon pa laga kontrolá esakinan mas pronto posibel pa sa si nan ta genuino. Por hasi esaki na ofisina di CBCS na Skalo riba dia di trabou, di 08.00 pa 12.00 or, mustrando un dokumento di identidat.
CBCS ta trahando estrechamente ku polis i outoridatnan hudisial pa averiguá orígen di e biyetenan falsu i evitá ku nan ta sigui plama. Pa tur klaridat, CBCS ta informá ku no ta permití pa niun persona ni establesimentu aseptá òf paga ku biyete falsu. CBCS ta rekomendá pa bo alertá polis mas pronto posibel si bo ta kere ku bo a wòrdu konfrontá ku un biyete falsu. Pa falsifikashon di sèn òf pago hasí konsientemente ku sèn falsu, tin un kastigu máksimo di 9 aña di prizòn.
Willemstad, 20 di yüni 2025
CENTRALE BANK VAN CURAÇAO EN SINT MAARTEN