National Payment Council ta komprometé pa kombatí froude di pago 

WILLEMSTAD/PHILIPSBURG — E lansamentu konhunto di un kampaña informativo kontra  froude di transakshon di pago ta e resultado mas importante di e promé reunion di National  Payment Council (NPC) na 2025. E reunion akí a tuma lugá dia 9 di yüni na Kòrsou i dia 12 di  yüni 2025 na Sint Maarten, na Centrale Bank van Curaçao en Sint Maarten (CBCS). Durante e  reunion, a trata vários tópiko riba tereno di prosesamentu di pago, inkluyendo tarifa lokal di  tarheta di pago, estafa di pago i desaroyo di funshonalidat di Instant Payment (pago  instantáneo).  

Na Kòrsou i Sint Maarten kontinuamente ta ofresé mas método inovativo di pago, inkluyendo por  ehèmpel lenk di pago i inisio di pago ku kódigo QR. E desaroyo akí ta positivo, pasobra esaki ta  hasi pago mas rápido, mas fásil i mas efisiente pa konsumidó i kompania. Sinembargo, e formanan  di pago akí ta trese riesgo tambe, manera por ehèmpel froude di pago online. E tipo di froude akí 

por trese pèrdida finansiero i ménos konfiansa den pago digital. P’esei, e miembronan di NPC a  tuma e inisiativa pa krea un kampaña di konsientisashon pa atvertí tokante di e riesgonan i pa siña  hende kon nan por protehá nan mes kontra estafa ku transakshon di pago. Durante e último  reunion di NPC a papia tokante e kampaña akí, ku lo kuminsá pronto. 

Un di e resultadonan mas importante ku a sali for di e reunionnan di NPC di desèmber 2024, tabata  e nesesidat pa e bankonan konhuntamente strukturá tarifa lokal di tarheta di pago. Un aspekto  importante ta konfigurashon uniforme di e aparatonan di pago (mashinnan di Point-of-Sale) i  bankomátiko (ATM). P’esei na febrüari 2025 a tuma lugá un siguiente reunion ku asosiashonnan di  bankero tokante solushon pa e problemanan akí. Durante e reunionnan di NPC di yüni último, a  resultá ku entretantu a solushoná vários di e problemanan, pero ku ta keda nesesario pa sigui duna  atenshon na sierto kaso ku ta kousa tarifa robes i aparato di pago ku ainda no ta konfigurá pa  aseptá tur tarheta di pago. 

Finalmente, a trata tambe e desaroyonan riba tereno di Instant Payment. Ta apliká e téknika akí aktualmente pa prosesá pago lokal entre bankonan denter di algun sekònde. Resientemente a kuminsá ofresé tambe servisio di pago riba e ret di Instant Payment kual ta hasi posibel pa hasi  pago sin tarheta di pago na tienda físiko, tienda online i entre persona. CBCS a informá NPC 

tokante e instrukshonnan tékniko ku nan ta redaktando pa regulá e tipo di aplikashonnan akí. E instrukshonnan tékniko akí ta enserá tambe standart di “Open-Banking”. Open-banking ta hasi  posibel pa kompanianan ofresé aplikashon ku ta duna akseso na dato di kuenta bankario, manera transakshon i saldo di kuenta, di un manera efisiente i ku kua por inisiá pago tambe. Banda di  desaroyá e instrukshonnan aki, CBCS ta eksplorá tambe e posibilidat pa ofresé Instant Payment internashonal entre Kòrsou i Sint Maarten ku Boneiru, Aruba i Hulanda. 

Willemstad, 24 di yüni 2025 

CENTRALE BANK VAN CURAÇAO EN SINT MAARTEN 

NPC ta un plataforma pa diálogo riba tereno di maneho di sistema di pago entre e instansianan  kompetente, CBCS i Regulatory Authority of Curaçao (RAC), i interesadonan, na kua ta pèrkurá pa un representashon balansá di interes públiko i privá ku tin keber ku aktividatnan di sistema di  pago. Ademas di e instansianan kompetente, e membresia di NPC ta limitá na un grupo sentral di institushonnan relevante pa e temanan spesífiko di diskushon, inkluyendo representante di  suministradó di servisio di pago, manera e asosiashonnan di bankero di Kòrsou i Sint Maarten i  Curaçao Fintech Association, i di usuarionan di servisio di pago, manera instansianan  gubernamental, kompanianan públiko di utilidat i tambe asosiashonnan di konsumidó i di  negoshi. 

Tambe NPC ta sirbi komo e lugá kaminda suministradónan di servisio di pago (Payment Service  Providers) i usuarionan por interkambiá i diskutí riba nan ekspektativa i desafionan, i  posiblemente transformá esakinan den funshonalidat nobo den e sistema nashonal di pago. E  ophetivonan prinsipal di NPC ta: desaroyo di maneho, seguridat i efisiensia, inklushon finansiero,  inter-operabilidat, informashon i konsientisashon.