BREAKING NEWS KOMUNIKADO DI PRENSA: Lei di Partisipashon Laboral pa Hóbennan i Exonerashon di Overtime ta drenta na vigor ora gobernador firma

 

BREAKING NEWS

KOMUNIKADO DI PRENSA: Lei di Partisipashon Laboral pa Hóbennan i Exonerashon di Overtime ta drenta na vigor ora gobernador firma

Willemstad – Riba 25 juni 2025, Konseho di Minister a aproba e lei di partisipashon laboral di hóbennan, un inisiativa di Parlamentarionan di MFK ofisialmente. E lei a bai pa gobernador firma pa asina e lei por wordu publika i drenta na vigor. E logro grandi aki ta marka un fase nobo den e lucha kontra desempleo bou di hóbennan i den konstrukshon di un futuro kaminda tur hóben na Kòrsou por haña un chèns real pa traha.

Minister di Finansa ta felisitá presidente di Parlamento, señor Brownbill, i tambe Minister di Tráfiko, Transporte i Planifikashon Urbano (VVRP), señor Cooper, pa nan partisipashon aktivo i envolvimentu durante e proseso pa kristalisá e lei importante aki. Esaki ta un lei ku por kambia bida.

Doñonan di trabou tin un ròl esensial den esaki. E lei aki ta un invitashon – un yamada – na tur empresario, kompania i instansia riba nos isla pa duna nos hóbennan un chèns. Bou di sierto kondishonnan, doñonan di trabou ta haña eksonerashon di e primanan sosial, si nan kontratá hóbennan entre 18 i 29 aña di edat.

Esaki no solamente ta baha gastu di salario, sino ta tambe un invershon den e potensial i futuro di nos komunidat. Kabinete Pisas 3 ta hasi un yamada na sektor privá pa tuma un hóbennan sin eksperensia of ku no a kaba skol den servisio. Duna e hóbennan un chèns. Ofresé nan un espasio pa siña, pa traha i pa krese. Ku e lei aki nos ta duna e doño di trabou chens pa baha gastu di salario pero ta boso mester habri porta pa yu di tera haña trabou.

Pa e hóbennan mes tambe, e lei aki ta mas ku un kambio di maneho: e ta un señal di konfiansa. Ku eksonerashon di loonbelasting, e hóbennan ta keda ku mas sen den su saku. Sen ku e hóben a traha duru pa gana.

OVERTIME
Ademas pa loke ta trata overtime (oranan èkstra), te ku 520 ora pa aña ta eksonerá di impuesto pa TUR trahado. E kambio di lei ta konta pa TUR trahado den sektor priva i gobernu ku ta traha overtime. Esaki ta un rekonosementu ku esun ku hasi mas esfuerso, mester por gana mas tambe.
Minister Cooper a lucha hopi aña pa por a logra esaki pa e trahadonan.

Pa MFK, esaki no ta solamente un lei fiskal. Nos ta kere ku trabou no ta solamente un fuente di entrada, pero tambe un fuente di dignidat, desaroyo personal i speransa. Ku tur hóben ku haña trabou awor si i ku tur doño di trabou ku duna chèns awor si, nos ta un paso mas serka di un Kòrsou kaminda ningun hende no mester keda pará na banda.

Nos ta bisa tur doño di trabou: invertí den futuro di nos isla – invertí den nos hubentut. Duna un hoben sin experiensia sin diploma
un chèns, duna nan konfiansa, duna nan perspektiva. Ku e lei aki nos ta duna boso e
instrumentonan. Awor ta na boso. I na tur hóben: bo futuro ta dependé di e stapnan ku bo ta tuma awe. Pues, solisitá aktivamente pa un trabou, kaminda bo por sigui siña i desaroyá bo mes, i kaminda bo ta haña benefisio fiskal na mes momentu.
Nos ta konta riba boso.