RvC ta enfatisá ku a atendé renunsia di èks Direktor Finansiero Ekonómiko na un manera minusioso
RvC ta enfatisá ku a atendé renunsia di èks Direktor Finansiero Ekonómiko na un manera minusioso
WILLEMSTAD/PHILIPSBURG — Hunta di Komisario (RvC) di Centrale Bank van Curaçao en Sint Maarten (CBCS) a tuma nota ku kontenido di un karta di dia 8 di yüli 2025 di Minister di Finansa di Kòrsou, dirigí na RvC di CBCS relashoná ku salida di su èks Direktor Finansiero Ekonómiko, a ser kompartí ku prensa lokal. RvC ta enfatisá ku a tuma e prekoushonnan nesesario relashoná ku e èks direktor su renunsia pa bai sigui su karera den un instituto bou di supervishon di Banko Sentral. Por sierto, a hasi esei apesar ku no tin niun disposishon den Statüt di Banko ni den lei ku ta regla un kambio di funshon asina.
Na promé lugá, RvC ke enfatisá ku e ta totalmente di akuerdo ku e puntonan di atenshon ku Minister a trese padilanti den su karta. E puntonan akí ta importante bèrdat i p’esei mes RvC a tene debido kuenta ku nan ora di atendé salida di e Direktor Finansiero Ekonómiko di CBCS, te asina leu ku lei ta duna espasio pa esei. Manera Minister mes tambe ta enfatisá, ta masha importante pa mantené konfiansa den sektor finansiero tantu lokal komo internashonal. P’esei, entretantu RvC a kontestá Minister, indikando ku RvC ta disponibel pa reuní kuné al respekto.
RvC ke enfatisá tambe ku, lamentablemente, Statüt di Banko den su forma aktual no ta kontené ningun disposishon ku ta regla un kambio di funshon di CBCS pa un otro instituto òf visevèrsa, sea promé, durante òf despues ku a nombra e persona den un funshon direktivo na CBCS. Tampoko, Statüt di Banko no ta stipulá un manera fiho pa disidí tokante retiro. Un retiro for di un funshon direktivo na CBCS solamente mester wòrdu konfirmá formalmente pa e Ministernan di Finansa di ámbos pais.
Apesar ku e asuntu akí no ta reglá ni den Statüt di Banko ni den otro lei òf regulashon relevante, kaminda ta nesesario, RvC a hasi palabrashon spesífiko pa por tin e garantianan nesesario relashoná ku e èks direktor su renunsia pa bai sigui su karera den un instituto bou di supervishon di Banko. Por sierto, den e kaso spesífiko akí, De Nederlandse Bank (DNB) mester a duna su aprobashon den kuadro di nombramentu di un stipuladó di maneho. E evaluashon ku DNB a hasi den e kuadro ei a kore pareu ku esun di CBCS, aunke e dos evaluashonnan akí tabata kompletamente lòs for di otro.
Por último, RvC ke menshoná ku ta formulando un konsepto pa revishon di Statüt di Banko i ku den dje tin reglá un ‘cooling-off period’ pa e miembronan di hunta di maneho di CBCS. Ta
trahando riba e konsepto di Statüt di Banko den kolaborashon estrecho ku Fondo Monetario Internashonal (IMF) i ta spera ku e aña akí mes lo por present’é na gobièrnu di Kòrsou i esun di Sint Maarten.
Willemstad, 13 di yüli 2025
CENTRALE BANK VAN CURAÇAO EN SINT MAARTEN